Martın 11-də Bakı Kitab Mərkəzində Avropa İttifaqının Azərbaycandakı nümayəndəliyinin və  “Arts Council Azerbaijan” təşkilatının dəstəyi ilə mədəni irsə həsr olunmuş FanatzEU Avropa festivalı çərçivəsində Latviya Respublikası səfirliyinin və Nizami Gəncəvi Beynəlxalq Mərkəzinin təşkil etdiyi ədəbi gecə keçirildi.

Tədbirdə Latviyanın sabiq Prezidenti Vayra Vike-Frayberqanın "Nizami Ganjavi's Seven Beauties and others essays on literature” kitabının və Latviya yazıçısı Ernest Birzniek-Upitin “Qafqaz hekayələri” kitabının təqdimatı baş tutdu.

Latviya Respublikasının Azərbaycandakı səfirliyinin mədəniyyət, təhsil və iqtisadi məsələlər üzrə müşaviri Elmira Mirzəyevanın moderatorluğu ilə keçirilmiş tədbirə Latviyanın sabiq Prezidenti, xanım Vayra Vike-Frayberqa Zoom vasitəsilə qatıldı.

Ədəbi gecədə Latviya Respublikasının ölkəmizdə səfiri Daynis Qarançs, Missiya  başçısının müavini Viya Buşa, MM deputatı Qənirə Paşayeva çıxış edərək dahi şair və mütəfəkkir Nizami Gəncəvinin parlaq irsindən, onun yaradıcılığında qadın surətlərinin tərənnümündən danışdı.

Qərbi Kaspi Universitetinin rektoru Hüseynqulu Bağırov Universitetin Nəşriyyat - Poliqrafiya Mərkəzinin dəstəyi ilə Azərbaycan dilinə tərcümə edilmiş “Qafqaz hekayələri” kitabının Azərbaycan və Latviya arasında dostluq əlaqələrinin dərinləşdirilməsində rolunu xüsusi qeyd etdi.