Kitablar
Heydər Əliyev Fondu uşaq evləri və internat məktəblərinə kitablar hədiyyə edib
18.03.2022
Heydər Əliyev Fondu uşaq evləri və internat məktəblərinə kitablar hədiyyə edib

Aksiya Bakı Kitab Mərkəzi və bp Azərbaycan şirkətinin dəstəyi ilə icra olunan "Yüksəl" təhsil layihəsi çərçivəsində keçirilib. Qeyd edək ki, 2020-ci ilin yanvar ayında başlayan "Yüksəl" layihəsinə mindən çox tələbə qatılmış və onlara 4000-də çox kitab hədiyyə olunmuşdur.

Aksiya çərçivəsində Heydər Əliyev Fondunun “Regional İnkişaf” İB-nin könüllüləri Bakı, Gəncə, Lənkəran və Şəkidə uşaq evləri, internat məktəbləri, xüsusi qayğıya ehtiyacı olan uşaqların sosial xidmət müəssisələrində olub, Azərbaycan, türk, rus və ingilis dillərində uşaqlar üçün şeirlər, hekayələr, tapmacalar, ensiklopediyalar və digər mövzularda ümumilikdə 2000-dən çox kitab paylayıblar.

Həmçinin, martın 17-də Xəzər Gənclər Evində  Novruz bayramına həsr olunan proqram təqdim edilib, Gənclər Evinin kitabxanasına müxtəlif nəşrlər hədiyyə olunub.

Aksiyanın davamı olaraq martın 18-də Bakı Kitab Mərkəzində bir sıra uşaq evlərinin və internat məktəblərin sakinləri üçün "Novruz gəlir, yaz gəlir" adlı tamaşa nümayiş etdirilib. 3 nömrəli Uşaq-Gənclər İnkişaf Mərkəzinin hazırladığı tamaşada qədim bayramın özünəməxsus adət-ənənələri və rəmzləri öz əksini tapıb. Tamaşada "Çiçəyim" uşaq teatrının aktyorları və "Azəri inciləri" vokal və rəqs qrupu iştirak edib. Quruluşçu rejissor və ssenari müəllifi R. Kərimovadır. Sonda gənc tamaşaçılara Bakı Kitab Mərkəzinin adından şirniyyat hədiyyə olunub.

Sizə necə kömək edə bilərik?