BMT-nin Azərbaycandakı nümayəndəliyi və Bakı Kitab Mərkəzi Martın 7-də Beynəlxalq Qadınlar Günü münasibətilə “Gender qərəzliliyi, ayrı-seçkiliyin siyasət və təcrübə vasitəsilə aradan qaldırılması” adlı panel müzakirəsi keçirib. Hökumət, beynəlxalq təşkilatlar, vətəndaş cəmiyyəti və akademik dairələri təmsil edən 50-dən çox iştirakçının qatıldığı müzakirədə gender ayrı-seçkiliyi, gender qərəzliliyi, habelə onları aradan qaldırmaq üçün effektiv beynəlxalq təcrübələr və onların Azərbaycanda tətbiqi strategiyaları müzakirə olunub.
Panel müzakirəsində əsas natiqlər BMT-nin Rezident əlaqələndiricisi Vladanka Andreeva, Bakı Kitab Mərkəzinin direktoru Günel Rzayeva, Niderland Krallığının səfiri Pauline Eizema,  “APA Media Group”-un Baş direktoru Vüsalə Mahirqızı və “Ümidli Gələcək” təşkilatının İcraçı direktoru Kəmalə Aşumova olub. Müzakirəyə ABŞ Beynəlxalq İnkişaf Agentliyinin (USAID) Azərbaycan üzrə missiya direktoru Cey Sinqx moderatorluq edib.