Fevralın 24-də Bakı Kitab Mərkəzində M. Maqomayev adına Azərbaycan Dövlət Akademik Filarmoniyasının “Gənclərə dəstək” layihəsi iştirakçıları ilə birlikdə Xocalı soyqırımının 30-cu ildönümünə həsr olunmuş "Xocalı harayı" adlı ədəbi-musiqili gecə keçirilib. Gecədə çıxış edən Bakı Kitab Mərkəzinin direktoru Günel Rzayeva və 44 günlük Vətən Müharibəsi qaziləri Xankişi Yusifov və Cavid Həsənov Xocalı soyqırımının bəşəriyyət tarixində ən ağır cinayətlərdən biri olduğunu vurğulayıb, bu yaranın Azərbaycan xalqının qəlbində ən ağrılı yara olduğunu qeyd ediblər. Gecədə Q. Qarayev adına Azərbaycan Dövlət Kamera Orkestrinin solisti Rövşən Əmrahov, Azərbaycan Respublikasının Əməkdar artisti Nərgiz Əliyeva, Respublika və beynəlxalq müsabiqələr laureatları Vagif Qurbanov, Camalə Abdinzadə, Əzizə Ağazadə, Xədicə Hacılı, Səbinə Həsənzadə, Nuranə Əliyeva və digər musiqiçilərin ifasında Q. Qarayevin, F. Əmirovun və dünya bəstəkarlarının əsərləri səslənib. Ədəbi hissədə tanınmış aktyor Hüseynağa Aslanov və qiraətçi Xəzər Süleymanlı xalq şairləri Rəsul Rza, Ramiz Rövşən və Nəbi Xəzri və Nurəngiz Günün məşhur şeirlərini ifa etdilər.