İyunun 17-də BKM-nin təşəbbüsü ilə yaradılmış və BP şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsinə yenidən start verildi.
 
“Xarizmatik insanın 5 sirri” adlı seminarı biznes etiket və müqavilələrin bağlanması üzrə ekspert, beynəlxalq təlimçi, Etika Akademiyasının rəhbəri Günel İbrahim apardı.
 
“Yüksəl” layihəsinin üçüncü mərhələsi çərçivəsində ZOOM platforması vasitəsilə keçirilən seminara 80 nəfərdən artıq tələbə qoşulmuşdu.
 
Onların arasında ADPU, ADNSU, BSU, Bakı Mühəndislik Universiteti, ADU, M.V. Lomonosov adına Moskva Dövlət Universitetinin Bakı filialı, ATU, Bakı Musiqili Akademiyası, Azərbaycan Mədəniyyət və İncəsənət Universiteti, Azərbaycan Dövlət İqtisad Universiteti və digər ali müəssisələrin, habelə Təhsil Nazirliyinin “Bir” Tələbə-Könüllü Proqramının nümayəndələri olmuşdur.
 
Seminarda iştirakçılar xarizmatik insan olmaq üçün daxili bacarıqların inkişaf yollarını öyrəndilər. Aparıcı xarizmatik şəxsiyyət olmaq üçün vacib olan amillərdən danışarkən, daxilən güclü, istiqanlı, mehriban, iradəli və səbirli olmaq sirləri ilə bölüşdü, insanlara qarşı loyal və tolerant olmaq vacibliyini vurğuladı. Seminarda, həmçinin, xarizmanın yarada bilən geyimlərdən və davranış qaydalarından bəhs olundu. Mühazirəçi qeyd etdi ki, xarizmatik insanın 5 sirri - daxili güc, natiqlik, davranış qaydaları, geyim və insanları olduğu kimi qəbul etmək bacarıqlarıdır.
Seminarda, həmçinin, əvvəlki tədbirdə hədiyyə olunan kitabların ətrafında sual-cavab formasında müzakirə aparılıb.
 
Qeyd edək ki, iştirakçılar Günel İbrahim tərəfindən tövsiyə olunmuş kitabları Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.