Yanvarın 17-də Bakı Kitab Mərkəzində Çingiz Ələsgərlinin  “Tale yazısı” kitabının təqdimatı keçirilib. Xalq artisti Cəfər Namiq Kamalın 70 illik yubileyinə həsr olunmuş kitabda görkəmli aktyorun əsrin dörddə biri qədər davam etmiş zəngin yaradıcılığı ətraflı şəkildə araşdırılıb. 
Tədbirdə yazıçı-dramaturq Çingiz Ələsgərli, xalq artistləri İlham Namiq Kamal, Bəsti Cəfərova, Mərahim Fərzəlibəyov, Tariel Qasımov, Ramiz Həsənoğlu, əməkdar incəsənət xadimi Əli Əmirli, sənətşünaslıq üzrə fəlsəfə doktoru Vidadi Qafarov, Xalq yazıçısı Natiq Rəsulzadə və digər çıxış edənlər Cəfər Namiq Kamalın yaradıcılığından danışıb, onun sənətinin, yaradıcılıq irsinin və şəxsiyyətinin öyrənilməsində təqdim edilən nəşrin önəmli rol oynamasını vurğulayıblar.
Qeyd olunub ki, Cəfər Namiq Kamal sənətkar kimi Azərbaycan Dovlət Gənc Tamaşaçılar Teatrının və Akademik Milli Dram Teatrının səhnələrində parlaq yaradıcılıq yolu keçib və fitri-istedadı sayəsində Azərbaycan teatr mədəniyyətdə özünəməxsus iz qoyub. 
Kitabda aktyorun bu gün də uğurla davam etdirilən zəngin yaradıcılıq təcrübələri, yaratdığı və ya müxtəlif səbəblərdən yaratmadığı obrazlar haqqında düşüncələri, mülahizələri, arzuları, başına gələn məzəli hadisələr, fotolar və xatirələr toplanıb. Kitabın nüsxələri tədbir iştirakçılarına hədiyyə edilib. Qeyd edək ki, kitab Bakı Kitab Mərkəzində satışdadır.