İyunun 24-də Baku Book Center-in təşəbbüsü ilə yaradılmış və BP şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsinin 3-cü mərhələsi çərçivəsində SAT Group şirkətinin rəhbəri, satış üzrə mütəxəssis Azad Qəhrəmanovun “Satışda qızıl qaydalar” mövzusunda online mühazirəsi keçirilib.
 
ZOOM platforması vasitəsilə keçirilən mühazirəyə 35 nəfərdən artıq tələbə qoşulmuş, onların arasında Azərbaycan Respublikasının Prezidenti yanında Dövlət İdarəçilik Akademiyası, Xəzər Universiteti, Bakı Dövlət Universiteti, M.V. Lomonosov adına Moskva Dövlət Universitetinin Bakı filialı, Azərbaycan Dillər Universiteti, Azərbaycan Dövlət Pedaqoji Universiteti, Bakı Slavyan Universiteti, habelə Təhsil Nazirliyinin “Bir” Tələbə-Könüllü Proqramının nümayəndələri olmuşdur.
 
Mühazirəçi satış sahəsində işləmək istəyənlər üçün maraqlı ola biəcək satış texnikalarından danışıb, satış fəaliyyətində uğurlu olmaq üçün 7 əsas qaydaların sirrini açıqladı.
 
Azad Qəhrəmanov bu “qızıl qaydaları” aşağıdakı kimi müəyyən etmişdir:
 
1. Müştərinə özünü üstün və dəyərli hiss etməsini təmin et
2. Məhsulu öyrəndiyin qədər müştərini öyrən
3. Əvvəl özünü «sat», sonra məhsulunu. (müştəri üçün təkcə məhsul deyil, həm də alış verişini kiminlə edəcəyi önəmlidir)
4. Satışın 5 addımı (dostlaşma, araşdırma, təqdimat, etirazla iş, razılaşma)
5. Satış edən sizin suallarınızdır, dəmir məntiqiniz deyil
6. İnsanlar faydaları alır, məhsulu deyil
7. İnsanlar faktlara inanır sözlərə deyil
 
Bir saata yaxın davam edən mühazirədə tələbələrin mövzu ilə bağlı sualları cavablandırılıb. Qeyd edək ki, iştirakçılar Azad Qəhrəmanov tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.