Maskalar COVİD-19 infeksiyasından qorumağa kömək edirmi? Koronavirus hansı hallarda ağır formada keçirilir? COVİD-19 xəstəliyin geniş yayılmış əlamətləri hansılardır? Özünüzün və başqalarının sağlamlığını qorumaq üçün ən effektiv tədbirlər nədən ibarətdir? Bu və digər sualları Dövlət Sərhəd Xidmətinin hərbi hospitalının baş həkimi, tibb elmləri doktoru, cərrah Kənan Yusif-zadə İyulun 1-də BKM-nin “YÜKSƏL” layihəsi çərçivəsində keçirilən növbəti mühazirəsində cavablandırdı.
 
Qeyd edək ki, “YÜKSƏL” layihəsi bu ilin yanvar ayından BP şirkətinin maliyyə dəstəyi ilə həyata keçirilir.
 
"COVİD-19. Xəstə və həkim gözüylə" adlı mühazirəsində Kənan Yusif-zadə özünün və ailə üzvlərinin koronavirusa yoluxmasından və bu xəstəlik ilə mübarizədən danışdı.
 
O, COVİD-19 xəstəliyinin əsas simptomları, ötürülmə üsulları və qəbul edilmiş müalicə qaydalarından danışarkən qeyd etdi ki, adətən yaşlı insanlar, həmçinin somatik xəstəlikləri olan şəxslər bu xəstəliyi daha ağır keçirirlər. Həkim qeyd etdi ki, COVİD‑19 virusuna yoluxmuş şəxsin asqırması və ya öskürməsi zamanı ağız və burun boşluğundan havaya buraxılan kiçik damcılar vasitəsilə virus yayılaraq digər insanlara keçə bilər.
 
Həkim özünü və ətrafda olan insanların sağlamlığını qorumaq üçün sosial məsafəni saxlamağın, üz nahiyəsinə toxunmazdan əvvəl əlləri yumağın və tibbi maskalardan istifadə etməsinin vacib olduğunu vurğuladı. Mühazirədən sonra K.Yusif-zadə tələbələrin mövzu ilə bağlı suallarına cavab verdi və mövzu ilə bağlı kitabları təqdim etdi.
 
ZOOM platforması vasitəsilə keçirilən mühazirəyə 35 nəfərdən artıq tələbə və müəllim qoşulmuş, onların arasında Bakı Dövlət Universiteti, Azərbaycan Dövlət Pedaqoji Universiteti, Azərbaycan Tibb Universiteti və İ. M. Seçenov adına Birinci Moskva Dövlət Tibb Universitetinin Bakı filialının nümayəndələri olmuşdur.
 
İştirakçılar K.Yusif-zadə tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.