Sentyabrın 23-də Bakı Kitab Mərkəzində Azərbaycan Yazıçılar Birliyinin təşəbbüsü ilə hazırlanan “Qarabağ dastanı. Otuz ilin həsrəti – 44 günün zəfəri” kitabının təqdimatı keçirildi.
Tədbirdə Vətən müharibəsi şəhidlərinin əziz xatirəsi bir dəqiqəlik sükutla yad edildi.
Təqdimatda çıxış edən Xalq yazıçıları Anar, Elçin, Çingiz Abdullayev, Milli Məclisin deputatı Jalə Əliyeva, AYB-nin katibi, yazıçı - jurnalist Rəşad Məcid, filologiya elmləri doktoru, professor Cahangir Məmmədli, BKM-nin direktoru Günel Anarqızı və tədbirin aparıcısı, əməkdar artist Nərgiz Cəlilova kitab haqqında düşüncələrini bölüşdülər. 
Xalq artisti Tünzalə Ağayeva, muğam müsabiqəsinin qalibləri Xəyal Hüseynov, Nisbət Sədrayeva, müğənni Azad Şabanovun çıxışları gecəyə xüsusi ovqat bəxş etdi.
Qeyd edək ki, “Qarabağ dastanı. Otuz ilin həsrəti – 44 günün zəfəri” kitabında tanınmış yazıçıların, ədəbiyyatşünasların, ictimai-siyasi xadimlərin Qarabağın mədəniyyəti, təbiəti, ənənələrinə dair, qələbəmizdən doğan qüruru əks etdirən yazıları toplanıb. Kitaba, həmçinin, Azərbaycanın görkəmli şairlərinin Qarabağa həsr etdiyi şeirləri daxildir.