Mayın 8-də Bakı Kitab Mərkəzində "Şuşa, sən azadsan!" adlı rəsm sərgisinin açılışı oldu. Sərgidə soydaşımız Alyona Bədəlovanın təsis etdiyi və ABŞ-da fəaliyyət göstərən “My Way” Uşaq və Yeniyetmələrin Yaradıcılıq Mərkəzi şagirdlərinin Qarabağa həsr etdiyi qırxa yaxın əsəri nümayiş olundu. Gənc amerikalı rəssamlar Qarabağın mədəniyyəti, füsunkar təbiəti haqqında məlumatı müxtəlif mənbələrdən toplayıb, əsərlərində əks etdirməyə çalışıblar.
Qeyd edək ki, həmin əsərlər və əsərlərdən ibarət eyni adlı kataloq 2019-cu ilin mayın 8-də Bakı Kitab Mərkəzində “Yolum keçir Qarabağdan” adlı rəsm sərgisində tamaşaçılara təqdim olunmuşdu. Həmin sərgidən düz iki il ötdü. 2020-ci ilin noyabrın 8-də Şuşa 28 illik işğaldan azad olundu və bu gün Baku Book Center bu çox rəmzi xarakter daşıyan sərgini artıq “Şuşa, sən azadsan!” adı ilə yenidən təqdim edir.