İyulun 8-də Milli Məclisin deputatı Nigar Arpadarai Bakı Kitab Mərkəzinin təşəbbüsü ilə yaradılmış və BP şirkəti tərəfindən maaliyyələşdirilən tələbə və gənclər üçün "YÜKSƏL" layihəsi çərçivəsində növbəti ONLINE mühazirə aparıb.

“Pandemiya sonrası təhsil: çətinliklər və imkanlar” adlı mühazirədə N.Arpadarai yeni reallıqda keyfiyyətli təhsilin təmin edilməsi ilə bağlı bir sıra məsələlərə nəzər salıb.

N. Arpadarai bildirib ki, bu gün - bəşəriyyətin təhlükəsi hesab olunan koronavirus pandemiyası vaxtında - vəziyyətdən çıxış yolları tapmaq, təhsildə yeni innovasiyalar tətbiq etmək, eyni zamanda post-pandemiya dövrünü nəzərə almaq zəruridir.

Mühazirəçi əvvəlki təhsil sistemindən uzaqlaşmaq prosesi,  alternativ təhsil alma və təhsil vermə formatının ortaya çıxması kimi geniş mövzulara da işıq salıb.

N. Arpadarai qeyd edib ki, yeni reallıqda distant  təhsil modelinin tətbiq edilməsi üçün addımlar atılmalıdır. “Azərbaycan gəncləri bu kimi yeniliklərə, yeni çağırışlara açıq olmalı, reallığa uyğunlaşmalıdır, yeni texnologiyaların təhsilə cəlb edilməsinə israrlı olmalıdır,”- deyə N.Arpadarai əlavə edib.

Pandemiyadan sonra təhsil sahəsində bizi nə gözləyir, online təhsil nə dərəcədə bizim həyatımıza daxil olacaq suallarını cavablandırarkən və online təhsilin üstünlüklərindən danışarkən, N. Arpadarai bildirib ki, yaxın gələcəkdə distant təhsil sistemi cavanlar üçün nəhəng imkanlar təklif edəcək.

“Yeni reallıqda universitetlər beyin mərkəzlrinə çevriləcək, təhsil bitməyən bir proses olacaq, bölgələrdə, kəndlərdə yaşayan gənclərimiz başqa ölkələrdə fəaliyyət göstərən məşhur alimlərin mühazirələrini dinləməyə imkan əldə edə biləcəklər”,- deyə N.Arpadarai bildirdi.  Bu baxımdan əsas fəaliyyət istiqamətlərindən biri də rəqəmsal bacarıqların formalaşdırılmasına xidmət edən tədbirlərin əhatə dairəsinin genişləndirilməsi olmalıdır.

ZOOM platforması vasitəsilə keçirilən mühazirəyə 90 nəfərdən artıq tələbə qoşulmuş, onların arasında Bakı Dövlət Universiteti, Azərbaycan Tibb Universiteti, Azərbaycan Respublikasının Prezidenti yanında Dövlət İdarəçilik Akademiyası, M.V. Lomonosov adına Moskva Dövlət Universitetinin Bakı filialı, Azərbaycan Dillər Universiteti, Bakı Slavyan Universiteti, habelə Təhsil Nazirliyinin “Bir” Tələbə-Könüllü Proqramının nümayəndələri olmuşdur.

İştirakçılar N.Arpadarai tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.