Sentyabrın 4-də Bakı Kitab Mərkəzində “Yazıçı ilə dialoq” layihəsi çərçivəsində Azərbaycan Yazıçılar Birliyinin sədri, Xalq yazıçısı Anar ilə görüş keçirilib. Görüşdən məmnunluğunu bildirən yazıçı tələbələrlə, gənclərlə və oxucularla yaradıcılığı barədə səmimi söhbət aparıb. O, müasir Azərbaycan ədəbiyyatı ilə bağlı düşüncələrini, xarici yazıçılar və sevdiyi əsərlər barədə fikirlərini bölüşüb, yazdığı ssenarilərdən və Yazıçılar Birliyinin fəaliyyətindən danışıb. Xalq yazıçısının yeni avtobioqrafik roman üzərində işləməsi görüş iştirakçılarında böyük maraq doğurub. Onun sözlərinə görə, yeni əsərdə ailə üzvlərinin və özünün şahidi olduğu tarixi hadisələr, tanıdığı insanlar və səyahət təəssüratları yer alacaq. Görüş zamanı məlum olub ki, Anar müəllim yeni ssenari üzərində işləmək imkanı qazansa, onu dramaturq, şair və nasir Cəfər Cabbarlının həyat və yaradıcılığına həsr edəcək. Cabbarlının taleyindən söz açan yazıçı, onu “Azad bir quşdum” misrası ilə xarakterizə edib. Tələbələrin suallarını cavablandıran Anar müəllim yazıçı olmaq istəyən gəncləri həmişə həqiqəti yazmağa çağırıb. O həmçinin Bakı Kitab Mərkəzinin açılışını yüksək qiymətləndirib:  “Belə genişmiqyaslı mərkəzin Bakıda yaradılması çox sevindirici haldır. Ümid edirəm ki, bu cür görüşlər burada mütəmadi keçiriləcək”, – deyə vurğulayıb.