Sentyabrın 11-də Bakı Kitab Mərkəzində “Yazıçı ilə dialoq” layihəsi çərçivəsində Azərbaycan Yazıçılar Birliyinin katibi, PEN klubun prezidenti, Xalq yazıçısı Çingiz Abdullayevlə yaradıcılıq görüşü keçirilib.Tanınmış yazıçı görüş zamanı öz yaradıcılığı barədə danışıb və iştirakçıların çoxsaylı suallarını cavablandırıb. Tədbirə yazıçının pərəstişkarları və kitabsevərlər qatılıb. Qeyd edək ki, 200-dən çox kitabın müəllifi olan Çingiz Abdullayevin əsərləri bir sıra beynəlxalq mükafatlara layiq görülüb və təkcə Azərbaycanda deyil, dünyanın müxtəlif ölkələrində də maraqla oxunur. İxtisasca hüquqşünas olan yazıçı, detektiv janrının məhsuldar nümayəndəsi kimi tanınır.Tədbirdə çıxış edən Ç. Abdullayev Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə Bakı Kitab Mərkəzinin yaradılmasını yüksək qiymətləndirib və bu mərkəzin gələcək nəsillərin maariflənməsində mühüm rol oynayacağını vurğulayıb.Yazıçı yaradıcılığının əsas istiqamətlərindən danışaraq gənclərə klassik və müasir Azərbaycan yazıçılarının, eləcə də dünya ədəbiyyatının əsərlərini oxumağı tövsiyə edib. O, futbola və caz musiqisinə olan sevgisindən, Azərbaycan mətbəxinə vurğunluğundan, həmçinin gənclik illərində valideynlərinin evində keçirdiyi xoş xatirələrdən söz açıb: "Mən çox xoşbəxtəm ki, valideynlərim uzun və mənalı ömür yaşadılar," – deyə bildirib. Çingiz Abdullayev həmçinin gəncləri xarici dilləri öyrənməyə çağıraraq qeyd edib: "Xarici dilləri bilmək hamımız üçün vacibdir, amma ilk növbədə öz dilimizi mükəmməl bilməli, doğma dilimizdə ədəbiyyat oxumalıyıq." Görüşün sonunda yazıçı pərəstişkarları üçün kitablarını imzalayıb və onlarla xatirə şəkilləri çəkdirib. Xatırladaq ki, “Yazıçı ilə dialoq” layihəsi çərçivəsində Bakı Kitab Mərkəzində tanınmış müəlliflər, yazıçılar, jurnalistlər və publisistlərlə görüşlər təşkil olunur.