Sentyabrın 17-də Bakı Kitab Mərkəzində “Tarixlə üz-üzə” layihəsi çərçivəsində görkəmli tarixçi alim, tarix elmləri doktoru, professor Dilarə xanım Seyidzadə ilə görüş keçirilib. Tədbir Azərbaycan Xalq Cümhuriyyəti hökumətinin 17 sentyabr 1918-ci ildə Gəncədən Bakıya köçürülməsinin 100 illiyinə həsr olunub. Çıxışı zamanı Dilarə Seyidzadə Azərbaycan Xalq Cümhuriyyətinin yaradılmasının 100 illiyinin bu ilin may ayında ölkəmizdə geniş şəkildə qeyd olunmasının mühüm siyasi və elmi əhəmiyyət daşıdığını bildirib. O, 2018-ci ilin “Azərbaycan Xalq Cümhuriyyəti İli” elan edilməsinə görə dövlətimizin başçısına təşəkkürünü ifadə edib. Tarixçi alim qeyd edib ki, Azərbaycan tarixinin Cümhuriyyət dövrü tarixsevərlər və tədqiqatçılar üçün hər zaman böyük maraq doğurub. Onun bu dövrə dair səsləndirdiyi çoxsaylı tarixi faktlar tədbir iştirakçıları tərəfindən böyük diqqətlə qarşılanıb. Görüş zamanı iştirakçıların suallarını cavablandıran alim vurğulayıb ki, XX əsrin əvvəllərindən etibarən Rusiya Dövlət Dumasında cəsarətli çıxışları ilə tanınan İsmayıl xan Ziyadxanov, Əlimərdan bəy Topçubaşov və digər görkəmli ziyalılar sonradan Azərbaycan Xalq Cümhuriyyətinin qurulmasında mühüm rol oynayıblar. Azərbaycan Xalq Cümhuriyyətinin formalaşmasında milli ziyalıların fədakar fəaliyyətinə toxunan professor Dilarə Seyidzadə AXC-nin inkişaf yolunda Gəncə şəhərinin və gəncəlilərin xüsusi rolunu da qeyd edib. Tədbir çərçivəsində Dilarə Seyidzadə müəllifi olduğu “Azərbaycan XX əsrin əvvəllərində: müstəqilliyə aparan yollar” adlı elmi monoqrafiyasını təqdim edib və oxucular üçün imzalayıb. Kitabda XX əsrin əvvəllərində Azərbaycanda baş verən ictimai-siyasi proseslərin geniş mənzərəsi, eləcə də Rusiya Dövlət Duması və Azərbaycan Xalq Cümhuriyyəti ilə bağlı maraqlı tarixi faktlar öz əksini tapıb.Nəşr tarixçilər, tədqiqatçılar, tələbələr və Azərbaycan tarixi ilə maraqlanan geniş oxucu kütləsi üçün nəzərdə tutulub.