Sentyabrın 18-i Azərbaycan xalqının dahi oğlu, milli musiqi mədəniyyətimizin banisi və korifeyi Üzeyir bəy Hacıbəylinin doğum günüdür. Artıq 20 ildən çoxdur ki, bu tarix ölkəmizdə Milli Musiqi Günü kimi qeyd olunur. Bu əlamətdar gün münasibətilə Bakı Kitab Mərkəzində musiqi axşamı təşkil olunub.Musiqi axşamının aparıcısı, əməkdar artist Nərgiz Cəlilova çıxış edərək Üzeyir Hacıbəylinin adı ilə bağlı bu əlamətdar gün münasibətilə musiqi ictimaiyyətini təbrik edib. Tədbirdə Xalq artisti Mənsum İbrahimov və “Qarabağ” muğam üçlüyünün ifasında Üzeyir Hacıbəylinin “Leyli və Məcnun” operasından Məcnunun ariyası, Xalq artisti Murad Hüseynovun ifasında Qara Qarayevin prelüdləri səsləndirilib. Həmçinin Xalq artistləri Gülnaz İsmayılova, Ülviyyə Hacıbəyova və əməkdar artist Elnarə Kəbirlinskayanın ifasında Üzeyir Hacıbəylinin “Arşın mal alan” operettasından Gülçöhrənin ariyası, V. Adıgözəlovun “Bakı” mahnısı, Niyazının “Arzu” romansı və digər musiqi nümunələri təqdim olunub. Xalq artisti Mehriban Zəki tədbirdə Nəsimi, M. Gəncəvi, M. Müşfiq, Rəsul Rza və Vaqif Səmədoğlunun şeirlərini səsləndirib. Murad Hüseynovun ifasında Qara Qarayevin “İnsan məskən salır” kinofilmindən musiqi gecəyə xüsusi rəng qatıb. Musiqi axşamında ölkənin tanınmış ziyalıları iştirak ediblər. Üzeyir Hacıbəyli Azərbaycan musiqisi tarixində ilk opera, ilk musiqili komediya və bir sıra digər janrlarda ilk nümunələrin yaradıcısı kimi xüsusi yer tutur. Onun əziz xatirəsi xalqımızın qəlbində daim yaşayacaq. Qeyd edək ki, Üzeyir Hacıbəylinin anadan olduğu gün həm də ona həsr olunmuş Beynəlxalq Musiqi Festivalının açılışı ilə əlamətdardır. Heydər Əliyev Fondu və Mədəniyyət Nazirliyinin təşkilatçılığı ilə keçirilən festival hər il sentyabrın 18-də açılır və 10 gün davam edir.