İyulun 15-də BP şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsi çərçivəsində yazıçı, şair İlqar Fəhminin iştirakı ilə növbəti mühazirə təşkil olundu.  
 
Mühazirədən öncə İlqar Fəhmi Tovuz istiqamətində gedən döyüşlər zamanı həlak olmuş hərbçilərimizin xatirəsini yad etdi.
 
“Depressiv situasiyalarda ədəbiyyatın faydası” adlı mühazirədə mühazirəçi dünyanı bürümüş, pandemiya halına çevrilmiş yeni növ yoluxucu xəstəliyin, eyni zamanda millətlər arasında münaqişələrin kəskinləşməsinin insanların əhval-ruhiyyəsinə, psixi, emosional sağlamlığına mənfi təsirindən danışdı.
 
Onun sözlərinə görə, insanların bir qismi faciə, dərd, çətinliklər ilə üzləşərək, bu cür “stress yaradan” hadisələrdən “qaçmaq”, onları unutmaq,  digər qismi isə bu hadisələrin dərininə getmək, çətin vəziyyətdə olan insanlarla daim ünsiyyətdə olmaq yolunu seçir.
İ. Fəhmi  mürəkkəb, stresli situasiyalarda bədii və elmi ədəbiyyatın, incəsənətin müsbət rolunu vurğuladı. O, qeyd etdi ki, həm xarici, həm də Azərbaycan ədəbiyyatında insanların çətin vəziyyətlərlə üzləşməsi və bu vəziyyətlərdən çıxmaq yolları barədə bəhs edən əsərlərdən bəhrələnməsi vacibdir.
 
Ernest Heminqueyin “Qoca və dəniz” povestini nümunə gətirən şair, bu əsərin fəlsəfi mənaya malik olduğunu qeyd etdi. “Bu cür əsərlərlə yazıçılar insana onun həqiqi gücünü, cəsarətini dərk etməyə imkan yaradır, ehtiraslarını bacarığa necə çevirməyin yolunu göstərir”.
ZOOM platforması vasitəsilə keçirilən mühazirəyə 60 nəfərədək tələbə qoşulmuş, onların arasında Bakı Dövlət Universiteti, Azərbaycan Tibb Universiteti, ADA,  Xəzər Universiteti, Azərbaycan Respublikası Prezidenti yanında Dövlət İdarəçilik Akademiyası,  M.V. Lomonosov adına Moskva Dövlət Universitetinin Bakı filialı, Bakı Slavyan Universiteti, ADNSU, Azərbaycan Texniki Universiteti,  habelə Təhsil Nazirliyinin “Bir” Tələbə-Könüllü Proqramının nümayəndələri var idi.
 
İştirakçılar İlqar Fəhmi tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrinin əsasında əldə edə bilərlər.