Məşhur müğənni, bəstəkar, Azərbaycanın əməkdar artisti Miri Yusif pərəstişkarlarını sevindirməyə davam edir. Sentyabrın 23-də o, “Ulduzla oxu” layihəsi çərçivəsində Bakı Kitab Mərkəzinin qonağı olub. Görüşdə müğənninin pərəstişkarları ilə yanaşı, görmə əngəlli uşaqlar da iştirak ediblər. Tədbir zamanı populyar ifaçı pərəstişkarlarının çoxsaylı suallarını cavablandırıb, ən sevdiyi müəlliflər və kitablar haqqında danışıb, onlarla birlikdə oxuyub. Miri Yusif 27 oktyabr 1977-ci ildə Bakı şəhərində anadan olub. Onun musiqi karyerası 1996-cı ildə “Dəyirman” qrupunun tərkibində başlayıb. Daha sonra solo karyeraya başlayan sənətçi etnik caz, reqqi, rok, şanson və R&B üslublarında mahnılar yazaraq “Məktub”, “Mən küləyəm” və digər məşhur ifaları ilə geniş dinləyici auditoriyasının rəğbətini qazanıb.