Bir neçə il öncə İctimai Televiziya ilə yayımlanan “Bakının sirləri” verilişləri hələ də çoxlarının xatirəsindədir. Verilişləri Bakı şəhərinin tədqiqatçısı Fuad Axundov aparırdı və hər yeni buraxılışı tamaşaçılar böyük səbrsizliklə gözləyirdi. Bakı Dövlət Universitetinin Şərqşünaslıq fakültəsinin, Harvard Universitetinin məzunu və Toronto Universitetinin magistri olan Fuad Axundov hələ tələbəlik illərindən Bakı tarixi və memarlığı ilə maraqlanırdı. Sentyabrın 27-də Fuad Axundov Bakı Kitab Mərkəzinin qonağı oldu. “Tarixlə üz-üzə” layihəsi çərçivəsində keçirilən tədbirdə tarixçi və telejurnalist Fuad Axundov “İnqilabdan əvvəlki Bakının etnik və mədəni müxtəlifliyi” mövzusunda mühazirə ilə çıxış edərək şəhərin zəngin tarixi və inkişafı barədə geniş məlumat verdi. XIX əsrin sonu – XX əsrin əvvəllərində Bakının etnik tərkibindən danışan Fuad Axundov qeyd etdi ki, birinci neft bumu dövründə ən böyük icmalar azərbaycanlılar və ruslar idi. O, həmçinin Bakıda yaşayan yəhudi, polyak, alman, tatar, ləzgi, gürcü və digər icmalardan da söz açdı. Mühazirədə Fuad Axundov tanınmış yəhudi həkim E.Y. Qindesin, 1879–1895-ci illərdə Bakı şəhərinin meri olmuş Stanislav Despot-Zenoviçin, dəniz neft hasilatının pioneri, polyak Pavel Pototskinin fəaliyyətindən, Azərbaycanda təhsilin inkişafına töhfə verən tatar qadınlarından da bəhs etdi. Həmçinin, yunan icmasının görkəmli nümayəndəsi, Sürəyə Zəngəzurlu təxəllüsü ilə tanınan, Azərbaycan Dram Teatrında 50-dən çox rol oynamış və Stalin repressiyalarının qurbanı olmuş aktrisa Panfiliya Tanailidinin faciəvi taleyi tədbir iştirakçılarının diqqətinə çatdırıldı. Mühazirə zamanı XIX əsrin sonu – XX əsrin əvvəllərinə aid fotoların nümayişi də təqdim edildi. Tədbirin sonunda Fuad Axundov Heydər Əliyev Fonduna və Bakı Kitab Mərkəzinə təşkilatçılığa görə təşəkkürünü bildirdi. O, qeyd etdi ki, Bakı Kitab Mərkəzi insanların bilik səviyyəsini artırmaq üçün mükəmməl şərait yaradıb. “Mən əminəm ki, Bakı Kitab Mərkəzi köhnə Bakının ruhunu canlandıran bir məkan olacaq,” – deyə tarixçi söylədi.