Sentyabrın 29-da Bakı Kitab Mərkəzində Heydər Əliyev Fondunun təşkilatçılığı və Mədəniyyət Nazirliyinin dəstəyi ilə keçirilən “Nəsimi – şeir, incəsənət və mənəviyyat Festivalı” çərçivəsində dahi şair və mütəfəkkir İmadəddin Nəsiminin yaradıcılığına həsr olunmuş mühazirələr təşkil edilib. Tədbirdə Nəsimişünas Səadət Şıxıyeva və ədəbiyyatşünas Rafael Hüseynov çıxış edərək, Nəsiminin şeirlərinə nəzirələr və Yaxın və Orta Şərq poeziyasında bənzətmə ənənəsi mövzusunda mühazirələr söyləyiblər. Onlar böyük şairin yaradıcılığına nəzər salıb, tədbir iştirakçılarının suallarını cavablandırıblar. Festival çərçivəsində “Nəsimi Şeir Məclisi” də keçirilib. Məclisə Azərbaycan Yazıçılar Birliyinin nəzdində fəaliyyət göstərən “Xəzər” poeziya klubu qatılıb. Məclisin aparıcısı, klubun sədri, şair Hacı Arif Buzovnalı, Nəsiminin yaradıcılığından danışıb və iştirakçılara qəzəlxanlar Elsər Qədrini, Kamal Hüseynzadə, Nizami Mücahid, Vüsalə Mehri, Nicat Nəsri və Rüstəm Tofiqi təqdim edib. Gənclər Nəsiminin qəzəllərinə yazılmış nəzirə və təxmisləri səsləndiriblər. Tədbirin sonunda Heydər Əliyev Fondunun vitse-prezidenti, ictimai xadim və şairə Leyla Əliyeva tərəfindən “Sağ ol” və “Sükut” adlı iki poetik toplusunun təqdimatı olub. Kitablara şairənin “Toy”, “İnsanları sevmək”, “Sevgili dostum”, “İtirilmiş mələk”, “Yox olma”, “Birlikdə olmaq”, “Mən yaradıram”, “Yarpaq tökümü”, “Bəzən onlar yox olur”, “Yaşamaq haqqı”, “Qırmızı paltar”, “Günəş”, “Yuxu”, “Günlər keçir”, “Sən günahkarsan”, “Qadın” və digər şeirləri daxildir. Qeyd edək ki, kitabların rəngarəng və qeyri-adi illüstrasiyalarının müəllifi də Leyla Əliyevadır.