Oktyabrın 2-də Bakı Kitab Mərkəzində xalq yazıçısı, kinodramaturq Maqsud İbrahimbəyovun xatirə gecəsi təşkil olunub. Tədbirdə yazıçının yaxınları, dostları və onun yaradıcısının pərəstişkarları iştirak ediblər. Çıxış edənlər Maqsud İbrahimbəyovla bağlı xatirələrini bölüşüb, onun əsərlərinin doğma torpaq və köklərə bağlılığını vurğulayıblar. Yazıçının oxucuların qəlbinin ən incə tellərinə toxunmağı bacaran böyük söz ustası olduğu qeyd olunub. Uzun illər M. İbrahimbəyovla dostluq edən Azərbaycanın xalq yazıçısı Anar, onun xarizmatik, çox ağıllı bir insan olduğunu bildirib. “Lakin bütün bunların arxasında həqiqətən dərin və maraqlı bir yazıçı var idi,” – deyə əlavə edib. Psixologiya elmləri doktoru, professor Rəna İbrahimbəyova Heydər Əliyev Fonduna, şəxsən Mehriban xanım Əliyevaya, eləcə də Bakı Kitab Mərkəzinin yaradılmasına görə təşəkkürünü bildirib. “Mən çox şadam ki, Bakıda belə bir kitab mərkəzi fəaliyyət göstərir və burada Azərbaycan mədəniyyətinə töhfə vermiş insanların xatirəsinə həsr olunmuş gecələr keçirilir,” – Rəna xanım qeyd edib. Rəna İbrahimbəyova həmçinin Maqsud İbrahimbəyov haqqında deyib: “O çox maraqlı bir şəxs idi – bəzən çox kəskin, bəzən mehriban, bir çox hadisələri öncədən hiss edən və həmişə həqiqəti deyən...” Yazıçının əsərlərindən söz açan Leyla Bəyim-Cəfərova xalq yazıçının “Обжалованию не подлежит” romanından bəhs edib və kitabdakı əsas qəhrəmanın prototipi barədə məlumat verib. Tədbirdə Oxbridge Akademiyasının 8-ci sinif şagirdi Cəmilə Hüseynova, sənətşünas Rüstəm Hüseynov, Rusiya Teatr Sənəti İnstitutunun məzunu Aleksandr Hacıyevski və digərləri yazıçının ədəbi yaradıcılığı ilə bağlı fikirlərini bölüşüblər. Xatirə gecəsi zamanı yazıçının əsərlərindən parçalar səsləndirilib, həyatının müxtəlif mərhələlərini əks etdirən fotoşəkillər nümayiş olunub. Sonda yazıçının həyat yoldaşı Anna İbrahimbəyova çıxış edərək Heydər Əliyev Fonduna və onun prezidenti Mehriban xanım Əliyevaya Bakı Kitab Mərkəzinin yaranmasına və Maqsud İbrahimbəyovun xatirəsinin ehtiramla yad olunmasına görə təşəkkürünü bildirib.