Oktyabrın 14-də Bakı Kitab Mərkəzində «Ulduzla oxu» layihəsi çərçivəsində Azərbaycanın əməkdar artisti, tanınmış telejurnalist Nərgiz Cəlilova ilə görüş keçirildi.Görüşdə Nərgiz Cəlilovanın pərəstişkarları, həmkarları və gələcək peşə fəaliyyətlərini aparıcılıqla bağlamaq istəyən gənclər iştirak etdilər. Tanınmış telejurnalist çıxışı zamanı televiziyanın insanların həyatında rolundan, onu daha maraqlı və baxımlı etməyin vacibliyindən söz açdı. O, qeyd etdi ki, bu gün sosial şəbəkələr geniş yayılmasına baxmayaraq, mütaliəni əvəz edə bilməz, çünki məhz kitablar insanları həm maarifləndirir, həm məlumatlandırır, həm də onların dünyagörüşünü zənginləşdirir. Tədbir zamanı Azərbaycan dilinin saflığı və səlisliyi, onun qorunması yolları ilə bağlı maraqlı müzakirələr aparıldı. Nərgiz Cəlilova vurğuladı ki, ana dilində düzgün və səlis danışmaq aparıcı peşəsinin əsas tələblərindən biridir. Telejurnalist çıxışında dilin qorunmasında mühüm rol oynayan amillərdən, dilin zənginləşmə prosesindən bəhs etdi, eyni zamanda kütləvi informasiya vasitələrində ədəbi dil normalarının pozulmasının yolverilməz olduğunu diqqətə çatdırdı və ana dilimizin daxili saflığının qorunmasının vacibliyini vurğuladı. Sonda Nərgiz Cəlilova tədbir iştirakçılarının çoxsaylı suallarını cavablandırdı.