Oktyabrın 16-da Azərbaycanın xalq yazıçısı, əməkdar incəsənət xadimi, ədəbiyyatşünas və dramaturq Elçin Bakı Kitab Mərkəzinin növbəti qonağı oldu. “Yazıçı ilə dialoq” layihəsi çərçivəsində təşkil olunan görüşdə tanınmış ədəbiyyatçılar, ictimai xadimlər, yazıçının sənət dostları, ailə üzvləri, eləcə də oxucular iştirak etdilər. Tədbiri teatrşünas, əməkdar incəsənət xadimi Məryəm Əlizadə aparırdı. O, yazıçı Elçinin yaradıcılığından, onun Azərbaycan ədəbiyyatı və teatr sənətinə gətirdiyi yeniliklərdən, verdiyi dəyərli töhfələrdən, bir sözlə, yazıçının “yaradıcılıq laboratoriyası”ndan bəhs etdi. Daha sonra söz alan xalq yazıçısı Elçin ilk növbədə Bakıda belə möhtəşəm Kitab Mərkəzinin yaradılması münasibətilə bütün kitabsevərləri təbrik etdi. O, Bakı Kitab Mərkəzini Heydər Əliyev Fondunun prezidenti Mehriban xanım Əliyevanın nəcib təşəbbüsünün parlaq nəticəsi kimi qiymətləndirərək, bu mərkəzin gələcəkdə kitabın nüfuzunun bərpasında mühüm rol oynayacağına əminliyini bildirdi. Yazıçı çıxışında XX əsrin 60-cı illərində Azərbaycan ədəbiyyatı və incəsənətində hökm sürən xüsusi ab-havadan söz açaraq həmin dövrü “bədii-estetik hadisə” adlandırdı və onun sonrakı nəsillərə göstərdiyi böyük təsiri vurğuladı. Elçin, həmçinin yazıçı–tənqidçi münasibətlərinə, nəsrdən dramaturgiya janrına keçidinə və teatr sənətinə bağlılığına toxundu. O, hazırda Rus Dram Teatrında özünün “absurd” janrında qələmə aldığı yeni pyesinin məşqlərinin getdiyini də qeyd etdi. Görüş çərçivəsində keçirilən maraqlı diskussiyada dilçi-alim Nizami Cəfərov, xalq yazıçısı Elmira Axundova, şair Səlim Babullaoğlu, eləcə də yazıçının oxucuları və pərəstişkarları iştirak etdilər. Tədbirin sonunda xalq yazıçısı Elçin oxucuları üçün kitablarını imzaladı.