Oktyabrın 21-də Bakı Kitab Mərkəzində fransız musiqisinə və ədəbiyyatına həsr olunmuş ədəbi-musiqili gecə təşkil olunmuşdur. Fransa səfirliyi ilə birlikdə təşkil olunmuş tədbirdə tanınmış ziyalılar, ictimaiyyət xadimləri, xarici qonaqlar iştirak etmişlər.
 
Qonaqları salamlayan Bakı Kitab Mərkəzinin direktoru Günel Rzayeva Azərbaycan və Fransa dövlətləri arasındakı tarixən mövcud olan çoxəsrlik mədəni əlaqələrdən söhbət açaraq hazırkı dövrdə bu əlaqələrin daha da möhkəm və çoxsahəli olmasını qeyd etdi, onların getdikcə inkişaf etməsində dövlətimizin başçısı, Prezident İlham Əliyev və Birinci xanım Mehriban Əliyevanın əvəzsiz xidmətini xüsusilə vurğuladı. 
 
Tədbirdə çıxış edən Fransanın Azərbaycandakı səfiri xanım Aureliya Buşe Bakı Kitab Mərkəzində Fransanın mədəniyyətinə həsr olunmuş bu cür tədbirin keçirilməsindən dərin məmnunluğunu bildirib, Bakı Kitab Mərkəzində fransız dilində təqdim olunan çoxsaylı kitabları Fransa mədəniyyətinə və ədəbiyyatına böyük hörmət və ehtiram göstəricisi kimi qiymətləndirdi.
 
Musiqili poeziya axşamında Rusiyanın əməkdar artisti, pianoçu Aleksandr Qindinin, Beynəlxalq müsabiqələr laureatı, pianoçu Daniil Sayamovun, Beynəlxalq müsabiqələr laureatı Səidə Tağızadənin, Azərbaycan Respublikasının əməkdar artisti Aleksey Miltıxin ifasında dahi fransız bəstəkarları Moris Ravelin, Kamil Sen-Sansın, Klod Debüssinin və dahi Azərbaycan bəstəkarı Qara Qarayevin ölməz musiqi əsərləri səsləndi.