Oktyabrın 25-də Bakı Kitab Mərkəzində Fransanın “Connaissance et Memoires” nəşriyyat evinin təsisçisi və sahibi, tanınmış kitab naşiri Katrin Kormeri Bakı Kitab Mərkəzində “Bağ sənəti və memarlıq” adlı nadir kitablar kolleksiyasının təqdimatını keçirib.
 
Qonaqları salamlayan Bakı Kitab Mərkəzinin direktoru Günel Rzayeva Fransa səfirliyi ilə birlikdə təşkil olunan bu önəmli tədbirlərinin sayının gələcəkdə daha da artacağına ümidvar olduğunu söylədi.
 
Tədbirdə çıxış edən Fransanın Azərbaycandakı səfiri xanım Aureliya Buşe qeyd etdi ki, xanım Katrin Kormerinin kitablar kolleksiyası qədim ənənəyə malik olan bir nəşr nümunələridir.
 
Katrin Kormeri tədbirin təşkilinə görə Bakı Kitab Mərkəzinə və Fransa səfirliyinə dərin minnətdarlığını bildirdi. O, kitabların təkcə bilik mənbəyi yox, həm də incəsənət nümunəsi olduğunu qeyd etdi və kitabçılıq sənətinin məziyyətlərindən danışdı. Xanım Kormeri Fransada 10,000 nəşriyyat evlərinin mövcud olduğunu söylədi və onun Bakıya gətirilən kolleksiyasının bəzi nümunələrindən danışdı. Dedi ki, bu kitablar vaxtilə müxtəlif ölkələrin dövlət xadimlərinə hədiyyə olunmuşdu. Sonra xanım Kormeri qonaqları nadir kitablar kolleksiyası ilə tanış olmağa dəvət etdi.
 
Tədbirdə iştirak edən Fransanın Milli Muzeylər Birliyinin rəhbəri Arian De Gernon çıxış edərək “Mucha Trust Collection” çap məhsullarını Bakı Kitab Mərkəzinə hədiyyə etdi.
 
Tədbirin sonunda Bakı Kitab Mərəzinin adından Fransadan gələn qonaqlara hədiyyələr təqdim olundu.
 
Axşamın davamında pianoçu Səidə Tağızadə, kaman ifaçısı Ceyla Seyidova və Azərbaycan Respublikasının əməkdar artisti Nərgiz Kərimova qonaqları yaddaqalan gözəl ifaları ilə sevindirdilər.