Noyabrın 3-də Bakı Kitab Mərkəzində Anar Məmmədxanovun xatirə gecəsi və yazıçı-publisist Elmira Axundovanın ona həsr etdiyi kitabın təqdimatı və imzalanması baş tutub.
 
Tədbirdə BKM-nin direktoru G. Rzayeva qonaqları salamlayaraq sözü tədbirin aparıcısı tanınmış şoumen Murad Dadaşova təqdim edib. M. Dadaşov tamaşaçılarla A.Məmmədxanov haqqında səmimi xatirələriylə bölüşərək nəşr olunan kitabın əhəmiyyətindən söhbət açıb. Daha sonra yazıçı-publisist Elmira Axundova kitabın yaranma tarixindən və məziyyətlərindən danışıb. Tədbirdə, həmçinin, yazıçı Natiq Rəsulzadə, "Şən və Hazırcavablar Klubu"nun üzvü T. İmanov və A. Məmmədxanovun ailə üzvləri onun haqqında ürək sözləri və çox maraqlı xatirələri ilə bölüşüblər.
 
Tədbirin sonunda E. Axundova müəllifi olduğu kitabları oxucular üçün imzalayıb və A.Məmmədxanovun dostları, əfsanəvi "Bakılı oğlanlar" komandasının üzvləri bir neçə mahnı ifa ediblər.
 
2018 ildə “Şərq-Qərb” nəşriyyat evi tərəfindən buraxılmış "Anar Məmmədxanov. Kapitanın taleyi" adlı kitabda məşhur ictimai xadim, Şən və Hazırcavablar Klubunun "Bakılı oğlanlar" əfsanəvi komandasının unudulmaz kapitanı Anar Məmmədxanovun dolğun həyat yolu və zəngin yaradıcılığı əks olunub. 
 
Kitabda Anar Məmmədxanovun ziyalı əcdadlarından, onun uşaqlıq illərindən, "Bakılı oğlanlar" komandasının yaranma tarixindən, Milli Məclisdə fəaliyyətindən, futbola və internetə sevgisindən və ən müxtəlif insanlara səmimi, təmənnasız köməyindən bəhs olunur.  Anarın yaxınları – onun valideynləri, həyat yoldaşı İradə Məmmədxanova, bacısı Nahidə Məmmədxanova, sinif yoldaşları, dostları, "Bakılı oğlanlar" komandasının üzvləri, həmçinin, Azərbaycanın, Rusiyanın, Gürcüstanın mədəniyyət və incəsənət xadimləri, Milli Məclis deputatları və digərləri A. Məmmədxanov haqqında xatirələrini bölüşürlər.
 
Qeyd edək ki, Elmira Axundovanın “Anar Məmmədxanov. Kapitanın taleyi" kitabı «Байки от Анара Мамедханова» kiçik kitabça ilə birlikdə təqdim olunur.