Noyabrın 9-da Bakı Kitab Mərkəzində məşhur hindistanlı yoq və mistik Sadhquru (Sadhguru) ilə görüş və müəllifi olduğu "Mənəvi quruculuq" kitabının təqdimatı və imzalanması gerçəkləşib. Tədbirdə Heydər Əliyev Fondunun vitse-prezidenti Leyla Əliyeva iştirak edib.
 
Qonağı salamlayan Bakı Kitab Mərkəzinin direktoru G.Rzayeva Sadhqurunun Hindistanın 50 ən nüfuzlu şəxsiyyətlər siyahısına daxil olduğunu və 2017-ci ildə xalqına göstətdiyi fövqəladə xidmətlərinə görə "Padma Vibhushan" ali dövlət mükafatına layiq görüldüyünü qeyd edib. 
 
Sonra mühazirə ilə çıxış edən Sadhquru insanın bədəninə, duyğularına, daxili enerjisinə müdrikliklə nəzarət etmək metodlarından danışıb, görüş iştirakçılarının çoxsaylı suallarına cavab verib.
 
Məşhur yoq qeyd edib ki, insanların keçirdikləri iztirabın əsas səbəbləri onun yaddaşı və zəngin təxəyyülüdür. "İnsan özü ilə harmoniya taparsa, o, xoşbəxtlik da tapacaq", deyə o əlavə edib.
 
O vurğulayıb ki, insan adətən öz dərrakəsinin qurbanı olur. "Bu həyatdan zövq, həzz almaq, hər şeyin müsbət tərəfini görmək - xarici təsirlərdən özünü qorumağın ən yaxşı yoludur", deyə Sadhquru bildirib.
 
İştirakçılar məşhur Sadhquruya yoqa fəlsəfəsinə, düzgün qidalanmağa, insanlara xas olan qorxu və bədbinlik hisslərinə, insanın həyat tərzinə, yuxulara və s. aid suallar veriblər.
 
Tədbirin sonunda Sadhquru görüş iştirakçılarına kitablarını imzalayıb və BKM-nin xatirə kitabına ürək sözlərini yazıb.