Noyabrın 20-də Bakı Kitab Mərkəzində şair, publisist, tərcüməçi, 20 yanvar şəhidi Ülvi Bünyadzadənin ədəbi yaradıcılığına həsr olunmuş elmi konfrans keçirilib.

“Ülvi Bünyadzadə: şəxsiyyəti və ədəbi irsi” mövzusunda konfransı giriş sözü ilə açan Bakı Kitab Mərkəzinin direktoru Günel Rzayeva qeyd edib ki, öz istedadı ilə gənc ikən parlayan Ü. Bünyadzadə qısa, lakin mənalı ömür sürüb.

Filologiya üzrə elmlər doktoru Almaz Ülvinin aparıcılığı ilə keçirilən konfransda Ü.Bünyadzadənin həyat yoluna və yaradıcılığına nəzər salınıb.

Konfransda çıxış edən Almaz Ülvi konfransı keçirməyə dəstək verməsinə görə Bakı Kitab Mərkəzinə öz təşəkkürünü bildirib.

Digər iştirakçılar - akademik Muxtar İmanov, AMEA-nın müxbir üzvü, fəlsəfə üzrə elmlər doktoru Könül Bünyadzadə, Filologiya üzrə elmlər doktoru, professor İsmayıl Məmmədli, şair Xanəmir, filologiya üzrə fəlsəfə doktoru Şəhla Məcidova, Gəncə Dövlət Universitetin dosenti, filologiya üzrə fəlsəfə doktoru Afaq Yusifli, filologiya üzrə elmlər doktoru Yaşar Qasımbəyli və digərləri Ü.Bünyadzadənin yaradıcılığında vətənpərvərlik mövzusundan, onun əsərlərinin estetik-fəlsəfi dəyərlərindən, qısa və mənalı ömründən danışdılar.

Ülvi Bünyadzadə 1969-cu ildə Göyçə mahalının Basarkeçər rayonunun Kəsəmən kəndində ziyalı ailəsində dünyaya göz açmışdır. Ülvi ərəb, fars, latın, özbək dillərində yazıb-oxumağı, ingilis, rus dillərini isə mükəmməl bilirdi. Onun ədəbi yaradıcılığına 200-dən çox şeir, "Ömür yolu" poeması, "Qansızlar" povesti, 40-a yaxın hekayə, 5 pyes və 20-yə yaxın dünya ədəbiyyatından tərcümələr daxildir.

Ülvi Bünyadzadə 1990-cı il yanvarın 19-dan 20-nə keçən gecə, “Qara yanvar” faciəsi nəticəsində həlak olmuş, Bakıda, Şəhidlər Xiyabanında dəfn olunmuşdur. Ü. Bünyadzadə yaşadığı küçəyə onun adı verilmişdir.