Noyabrın 22-də Bakı Kitab Mərkəzində məşhur rusiyalı aktyor, rejissor və ədəbiyyatçı Veniamin Smexovun yaradıcılıq gecəsi keçirilib.
 
Qonağı salamlayaraq, Bakı Kitab Mərkəzinin direktoru Günel Rzayeva Bakı Kitab Mərkəzində teatr sənətinə və onun ədəbiyyatdakı təcəssümünə həsr olunan maraqlı görüşlərin təşkilinin gözəl ənənəyə çevrilməsinə ümüdvar olduğunu bildirib.
 
Məşhur aktyor Veniamin Smexov görkəmli rejissor Yuri Lyubimovun rəhbərliyi altında Taqanka teatrında işlədiyi illərdən, orada hökm sürən təkrarolunmaz ab-havadan, dostluq mühitindən, V. Vısotski və V. Zolotuxin ilə yaxın dostluğundan danışıb. 
 
Tədbirdə aktyor, həmçinin, auditoriyanın suallarına cavab verib və 2018-ci ilin əvvəlində Rusiyanın «Старое Кино» nəşriyyat evinin nəşr etdirdiyi «Здравствуй, однако…» («Salam, halbuki...») adlı yeni kitabını təqdim edib.
 
"Salam, halbuki ..." kitabının adı 60-cı illərin sonunda məşhur Taqanka teatrının aparıcı aktyorları Vladimir Vısotski və Valeri Zolotuxin tərəfindən V. Smexova yazılmış bir məktubun ilk misrasından götürülüb. Kitabda V. Smexov təkcə Vısotski haqqında yox, həmçinin, aktyor sənətinin incəliklərindən, müxtəlif filmlərin çəkilişlərindən söz açır, Taqanka Teatrı haqqında xatirələri ilə bölüşür. Kİtabda, eyni zamanda V. Smexovun 1973 – 1980 illərdə yazılmış şəxsi gündəliklərindən səhifələr də öz əksini tapıb. 
 
Bakıda V.Smexov «От Володи до Володи» (“Volodyadan Volodyayacan”) adlı poetik proqramını təqdim etdi. Proqrama Vladimir Mayakovskinin, İqor Severyaninin, Nikolay Erdmanın, David Samoylovun, Aleksandr Mejirovun, İosif Brodskinin, Vladimir Vısotskinin və s. şairlərin şeirləri daxildir. 
 
Uzun illər Moskvadakı Taqanka Teatrının aparıcı aktyorlarından biri olmuş V.Smexov, sonradan özünü istedadlı ssenarist, rejissor və ədəbiyyatçı kimi doğrultdu. Onun poetik axşamları ənənəvi olaraq bədii sözün, ədəbiyyat həvəskarlarını bir araya toplayır. Poetik axşamlar yalnız şeir oxumaqdan və səsli düşüncələrdən deyil, məşhur aktyorun sevdiyi şairlərin şəxsiyyətlərinə həyat və ədəbiyyat kontekstində şəxsi baxışından da ibarətdir.