Noyabrın 25-də Bakı Kitab Mərkəzində məşhur rəssam - kosmoqraf, astropsixolog, «Dünyanın doğuşu» Beynəlxalq Assosiasiyanın aparıcı mütəxəssisi Fərhad Sadıxovun iştirakı ilə “Daxili azadlığa aparan yol” adlı seminar keçirilib.

Fərhad Sadıхov unikal, əlvan mandalıların müəllifidir. Uzunmüddətli tədqiqat və təcrübə vasitəsilə, o, mandalanın yaradılmasının müqəddəs ənənəsinin mahiyyətini öyrənib.

Tədbirin əvvəlində F. Sadıxov Heydər Əliyev Fonduna və Bakı Kitab Mərkəzinin rəhbərliyinə insanları məhz bu məkanda mandala sənəti ilə tanış etmək imkanı yaratdıqlarına görə öz minnətdarlığını bildirdi.

Seminar zamanı F. Sadıxov mandalaların enerji qüvvəsi və onların insan orqanizminə təsiri barədə danışdı. Rəssam qeyd etdi ki, gözəl və mürəkkəb bir rəsm – mandala  insan və təbiət arasında harmoniya yaradır,  sakitliyə nail olmağa imkan verir. Onun sözlərinə görə, mandala texnikasının köməyi ilə insanın fərdiliyini ortaya çıxarmaq, qorxularını aradan qaldırmaq  və hətta bir çox xəstəliklərdən qurtarmaq mümkündür.

Rəssam –kosmoqraf, həmçinin, mandalanın burulma sahəsi ilə bir sınaq keçirdi.

Tamaşaçıların suallarını cavablandıran F. Sadıxov, insanın kosmosla sıx əlaqəsi, müxtəlif planetlərin insanın daxili orqanlarına,  psixi və fiziki sağlamlığına təsiri, müsbət düşüncənin əhəmiyyəti barədə də danışdı.

Tədbirin sonunda qonaqlar F. Sadıxovun əsərlərindən ibarət iki video-installasiyaya baxdılar və onun sirli mandalalarının canlı ekspozisiyasını izlədilər.

Buddist sakral rəmzi olan mandala bəşər tarixinin ən sirli simvollarından biridir.