Noyabrın 30-da Bakı Kitab Mərkəzində Azərbaycan Bəstəkarlar İttifaqının sədri, YUNESKO-nun “Sülh artisti” fəxri titullu, xalq artisti, AMEA-nın müxbir üzvü Firəngiz Əlizadəyə həsr olunmuş “Firəngiz Əlizadə. Dünya şöhrətli bəstəkarımız” adlı kitabın təqdimatı keçirilib.
 
Kitabın müəllifi və tərtibçisi əməkdar incəsənət xadimi, professor Həcər Babayevadır.
 
Tədbiri açan Bakı Kitab Mərkəzinin direktoru G. Rzayeva qonaqlara kitab haqqında məlumat verib. O deyib ki, kitabda “Şöhrət” və “Şərəf” ordenli professor Firəngiz Əlizadənin yaradıcılığının son 10 ili əhatə olunub.
Kitabın müəllifi Həcər Babayeva öz çıxışında qeyd edib ki, F. Əlizadə müasir Azərbaycan musiqi mədəniyyətinin dünya miqyasında ən tanınmış simalarındandır. Onun musiqisi minlərlə xarici dinləyicilər tərəfindən böyük rəğbətlə qarşılanaraq, ən geniş beynəlxalq arenada şöhrət qazanıb.
 
Sonra kitabda məqalələri dərc olunan müəlliflərdən Azərbaycan Yazıçılar Birliyinin sədri, Xalq yazıçısı Anar, akademik musiqişünas Zemfira Səfərova, Bakı Musiqi Akademiyasının professoru, sənətşünaslıq doktoru Cəmilə Həsənova, Milli Konservatoriyanın professoru, sənətşünaslıq üzrə fəlsəfə doktoru, Əməkdar İncəsənət xadimi Akif Quliyev və başqaları çıxış etmişlər.
 
Çıxışçılar kitabın əhəmiyyətindən, görkəmli bəstəkarın sənət fəaliyyətindən bəhs etmiş, Firəngiz xanımın Azərbaycan musiqi mədəniyyətini dünya səviyyəsində layiqincə təmsil edən ən parlaq şəxsiyyətlərdən biri olduğunu vurğulamışlar.
 
Qeyd olunmuşdur ki, Qara Qarayevin sevimli tələbəsi olmaq ona nəsib olmuş və onun yolunu davam etdirən Firəngiz Əlizadə bu gün dünyanın ən qabaqcıl bəstəkarına çevrilmişdir. O, daim axtarışda olan, yeni-yeni əsərləri ilə dünyanı fəth edən bəstəkardır.
 
Tədbirdə, həmçinin, istedadlı violin ifaçısı, beynəlxalq müsabiqələr laureatı Ceyla Seyidova, beynəlxalq müsabiqələr laureatı Səidə Tağızadənin piano müşayiəti ilə F.Əlizadənin “İmpuls” əsərini ifa etmişdir.
 
Qeyd edək ki, F. Əlizadənin həyat və fəaliyyətinin əlamətdar bir dövrünü əks etdirən kitab bəstəkarın 70 illik yubileyi münasibətilə 2018-ci ildə “Vətənoğlu” nəşriyyatında işıq üzü görmüşdür.
 
Nəşrdə dünyanın ən məşhur musiqi xadimlərinin Firəngiz xanım haqqında dediyi xoş sözlər, onun iştirak etdiyi tədbirlər, beynəlxalq konfranslar, müsabiqələr barədə ətraflı məlumatlar fotoşəkillərlə öz əksini tapıb. Kitabda Firəngiz Əlizadənin əsərlərinin dünya premyeraları, onun bəstəkar, pianoçu və dirijor kimi xarici ölkələrdə keçirilən konsertlərdə və festivallarda çıxışları haqqında məlumat, əsərlərinin maraqlı yaranma tarixçəsi, səhnə həyatı, onun ictimai xadim, bədii rəhbər və rejissor kimi çoxcəhətli fəaliyyəti əks olunub.