Dekabrın 2-də sevimli aktyorumuz, xalq artisti Fəxrəddin Manafov Bakı Kitab Mərkəzinin qonağı oldu.
 
“Ulduzla oxu” layihəsinin çərçivəsindəki görüşə populyar aktyorun çox sayda pərəstişkarı gəlmişdi. 
 
Qonaqları salamlayan aktyor, bu gözəl məkanın əhəmiyyətindən danışaraq tədbirin təşkilinə görə minnətdarlığını bildirdi. Daha sonra F. Manafov Qarabağın Xankəndi şəhərində keçirdiyi uşaqlıq illərindən, aktyor peşəsinə gəlməyindən və bu peşənin vurğunu olduğundan danışdı.
 
Xalq yazıçısı Anarın ssenarisi əsasında xalq artisti R. Ocaqovun çəkdiyi “Təhminə” filmində Zaur obrazını yaradan aktyor qeyd etdi ki, sevilən sənətkar Rasim Ocaqovla tanış olması onun kinokaryerasının başlanğıc nöqtəsi olmuşdur.
 
F.Manafov, həmçinin, Azərbaycanın istedadlı novator teatr rejissoru Vaqif İbrahimoğlunun onun sənət həyatında oynadığı roldan, “Yuğ” və “İbrus” teatrlarında işlədiyi vaxtlardan danışdı.
 
Pərəstişkarlarının çoxsaylı suallarını cavablandıran F.Manafov Azərbaycan kinosunun indiki vəziyyətindən, cavan istedadlı aktyorlardan, teatrda və kinoda yaratdığı obrazlardan, sevimli rollardan söhbət açdı. 
 
Tanınmış aktyor vurğuladı ki, teatr sənəti bu gün onun həyatında əsas və ən vacib mənanı kəsb edir. O əlavə etdi ki, Azərbaycanlı milyonçu, mesenat, xeyriyyəçi Zeynalabdin Tağıyevın obrazını yaratmaq arzusundadır.