İyulun 29-da Baku Book Center-in təşəbbüsü və BP şirkətinin maliyyə dəstəyi  ilə gerçəkləşən “YÜKSƏL” layihəsi çərçivəsində həkim-psixiatr Orxan İsgəndərov “İnsanlar bir-birinə niyə kömək edir?” adlı vebinar keçirib. 
 
Vebinarda "Biz niyə yardım edirik?; Niyə bir qrup insan digərinə daha çox kömək edir?; Yardimlaşmanı necə artıra bilərik?" kimi məsələlərə işıq salındı, empatiya-özgəçilik anlayışları barədə iştirakçılara məlumat verildi. 
 
Mühazirəçi məşhur amerikalı sosioloq və psixoloq K. Daniel Batsonun təcrübəsindən, onun "empatiya-altruizm hipotezi" barədə də söz açdı. Başqaları üçün fədakar qayğı arzusunu özündə cəmləşdirən altruizm haqqında danışarkən, O. İsgəndərov qeyd etdi ki, psixoloqlar altruizmin mövcudluğuna dair bir sıra fərqli izahatlar təklif etdilər.
 
Yaxınınla həmdərd olmaq və başqalarının duyğularını bölüşmək bacarığı olan empatiyanın vacibliyini, onun ünsiyyətdə, şəxsiyyətin inkişafında oynadığı rolunu vurğulayan həkim qeyd etdi ki, insan özünü başqa birinin yerinə qoyaraq qarşısındakı şəxsin müəyyən bir mövzuda hansı hissləri keçirdiyini, mənəvi əziyyətlərini, sevincini, kədərini və hətta həmin anda nələr düşündüyünü başa düşə bilir. Mühazirəçi, həmçinin, yardımlaşma üçün vacib olan xarakter, cinsiyyət, mədəniyyət, din, əhval-ruhiyyə kimi faktorlara nəzər saldı. O, qeyd etdi ki, biz yardımlaşma prosesini bitkilər, heyvanlar və mikroorqanizmlər arasında da müşahidə edirik. O. İsgəndərovun sözlərinə görə, canlılar nə gədər aliləşərsə, onların yardımlaşma xüsusiyyətləri bir o gədər də mürəkkəbləşir. İnsanların yardım etmək istəklərini artırmaq üçün fərqindəlilik və empatiya qurmaq çox vacibdir.
 
ZOOM platforması vasitəsilə keçirilən mühazirəyə 100 qədər tələbə qoşulmuş, onların arasında Bakı Dövlət Universitetinin Psixoloqiya fakültəsinin, ADA, Bakı Slavyan Universiteti, Azərbaycan Tibb Universiteti və İ. M. Seçenov adına Birinci Moskva Dövlət Tibb Universitetinin Bakı filialının tələbələri, habelə Təhsil Nazirliyinin “Bir” Tələbə-Könüllü Proqramının nümayəndələri olmuşdur.
 
Qeyd edək ki, iştirakçılar vebinarda Orxan İsgəndərov tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.