Dekabrın 14-də Bakı Kitab Mərkəzində dahi Azərbaycan şairi və dramaturqu Hüseyn Cavidin xatirəsinə həsr olunmuş gecə keçirilib.
 
Tədbiri açan BKM-nin direktoru G.Rzayeva tədbirin mahiyyəti və əhəmiyyətindən danışıb. H.Cavidin qısa, lakin mənalı həyatından, Azərbaycan və dünya ədəbiyyatına qızıl hərflərlə yazılan, ölməz əsərlərindən söhbət açıb. Sonra aparıcılığı tanınmış jurnalist Günay Malikqızına həvalə edib. 
 
Daha sonra xalq yazıçısı Elmira Axundova çıxış edərək bildirib ki, ümummilli lider Heydər Əliyev H.Cavid şəxsiyyətini və yaradıcılığını yüksək qiymətləndirmiş və məhz onun təşəbbüsü ilə Naxçıvanda şairin qəbri üzərində məqbərə ucaldılmışdır.
 
Şairin canəzəsinin Azərbaycana gətirilməsi ilə məşğul olmuş qrupun rəhbəri Həmid Cəfərov tədbirdə çıxış etmiş və demişdir ki,1982-ci ildə Cavidin cənazəsinin uzaq Sibirdən Azərbaycana gətirilməsi məhz H.Əliyevin təşəbbüsü və rəhbərliyi ilə həyata keçirilmişdir.
Sonra məktəblilərin ifasında alman, rus, fransız və ingilis dillərində H.Cavidin əsərləri səslənmişdir.
 
Tədbirdə, həmçinin, Milli Konservatoriya nəzdindəki Respublika İncəsənət Gimnaziyanın teatr bölməsinin şagirdləri H. Cavidin “Şeyx Sənan” və “İblis” pyeslərindən səhnəciklər göstərmişlər. 
 
Tədbirin musiqili hissəsində muğam ustası, əməkdar artist Nuriyyə Hüseynova və Milli Konservatoriyanın professoru Abbasqulu Nəcəfzadə çıxış etmişlər. 
 
Tədbirdə Milli Konservatoriya nəzdində fəaliyyət göstərən Respublika İncəsənət Gimnaziyasının rəssamlıq bölməsinin tələbələrinin əsərlərindən ibarət, ADR-nın 100 illiyi və şair H.Cavidə həsr olunmuş sərgi nümayiş olunmuşdur. 
 
Tədbirin sonunda N.Nərimanov rayon Gənclər və İdman İdarəsinin rəisi Nəcəf Novruzov uşaqlara diplomlar və təşəkkürnamələr təqdim etmişdir.