Yanvarın 29-da Bakı Kitab Mərkəzində «Tarixlə üz üzə» layihəsi çərçivəsində filologiya üzrə elmlər doktoru, professor Fəridə Səfiyevanın “Bir ömrün iziylə” adlı kitabının təqdimatı keçirildi.
 
Kitab görkəmli alim, Azərbaycan SSR Elmlər Akademiyasının vitse-prezidenti (1945—1950), Azərbaycan fəlsəfə tarixinin banisi, akademik Heydər Hüseynovun 110 illiyinə həsr olunub. 
 
Tədbirdə müəllif H. Hüseynovun həyat və yaradıcılığından, Azərbaycan elminə verdiyi töhfəsindən, maarifçiliyin inkişafında xidmətlərindən danışdı.
 
Tədbirdə video-təqdimat göstərildi, həmçinin, Heydər Hüseynovun həyat yoldaşına yazdığı məktublarından, qızının xatirələrindən parçalar səsləndi.
 
Respublika və beynəlxalq müsabiqələrin laureatları, pianoçu Vüsal Aydəmirov və tarzən İbrahim Babayev axşamı ifaları ilə zənginləşdirdi.
 
Təqdimatın sonunda çıxış edən Milli Məclisin deputatı, akademik Nizami Cəfərov Fəridə Səfiyevanın əməyini yüksək qiymətləndirib, H. Hüseynovun faciəli həyat yolu barədə fikirləri ilə bölüşdü. 
 
Qeyd etmək lazımdır ki, nadir foto və yazılı sənədləri əks etdirən, H. Hüseynovun həmkarlarının, tələbələrinin və ailə üzvlərinin xatirələri əsasında yazılan kitabda bu günə qədər ictimaiyyətə məlum olmayan bir çox məqamlara aydınlıq gətirilir.