Fevralın 10-da Bakı Kitab Mərkəzində görkəmli Azərbaycan bəstəkarı Elza İbrahimovaya həsr olunmuş musiqili gecə və "Mahnılar" adlı musiqi əsərlərinin toplusunun təqdimatı keçirilib.
 
Milli Konservatoriyanın elmi işlər üzrə prorektoru, professor Lalə Hüseynova tədbiri açaraq, E. İbrahimovanın həyat və yaradıcılığı haqqında fikirləri ilə bölüşdü, bəstəkarın qoyduğu zəngin musiqi irsindən danışdı. 
 
Lalə Hüseynova qeyd etdi ki, bir çox nəslin nümayəndələri məhz E. İbrahimovanın mahnıları ilə böyümüşdür. Onun mahnıları Rəşid Behbudov, Şövkət Ələkbərova, Lütfiyar İmanov, Sara Qədimova, Akif İslamzadə, Gülağa Məmmədov, Flora Kərimova kimi Azərbaycan musiqi mədəniyyətinin ən sevilən və korifey sənətkarları tərəfindən ifa olunmuşdur.
 
Gecənin musiqili hissəsində Elza İbrahimovanın əsərləri səsləndi. Xalq artisti Fidan Hacıyevanın ifasında pianoçu Şahin Yəhyazadənin müşayiəti ilə bəstəkarın "Mehribanım" mahnısı, xalq artisti Gülyanaq Məmmədovanın ifasında “Bilməzdim”, “Gedək üzü küləyə” mahnıları, Azərbaycan Dövlət Triosu (Elnarə Kəbirlinskaya (piano), Töhfə Babayeva (violin), Səbinə İbrahimova (çello)) ifasında “Fortepiano triosu"nun 1-ci hissəsi səsləndi.
 
Respublika və beynəlxalq müsabiqələrin laureatları, pianoçu Vüsal Aydəmirov və tarzən İbrahim Babayev “Rekviyem” əsərini ifa etdilər. Sonda əməkdar artist Sevda Ələkbərzadə bəstəkarın ən gözəl əsərlərindən olan “Sən yadıma düşəndə” mahnısını ifa etdi (pianoda müşayiət edən Muxtar Abseynov).