Avqustun 12-də BP şirkətinin maliyyə dəstəyi ilə reallaşdırılan “YÜKSƏL” layihəsi çərçivəsində Böyük Britaniyada fəaliyyət göstərən Azərbaycan Qadınlar Assosiasiyasının (AWA UK) yaradıcısı və prezidenti Ülviyyə Tağızadə “Diplomatik həyat tərzi nədir? Xaricdə uzunmüddətli yaşam təcrübəsi” adlı online mühazirə keçirib. 
 
Xaricdə yaşam təcrübəsi ilə bölüşən Ülviyyə Tağızadə diplomatik həyat tərzinin xüsusiyyətlərindən və problemlərindən danışdı.
 
Mühazirəçi xarici ölkələrdə yaşayan azərbaycanlıların təşkilatlanması, onların ölkəmizin ümumi maraqlarının müdafiəsi işinə cəlb edilməsi, soydaşlarımızın milli özünəməxsusluğunun qorunması ilə bağlı məsələlərə toxundu.
 
Tədbirdə, həmçinin, xaricdə yaşayan soydaşlarımız arasında milli birliyin və həmrəyliyin möhkəmləndirilməsinin təmin edilməsi, əlaqələrinin genişləndirilməsi istiqamətləri ilə bağlı məsələlər müzakirə edildi. Birləşmiş Krallıqda Azərbaycan qadınları Assosiasiyası barədə məlumat verən Ü. Tağızadə qeyd etdi ki, Assosiasiya 2017-ci ildə BK-da yaşayan Azərbaycanlı qadınların şəbəkəsini yaratmaq və onlar arasında əlaqələri genişləndirmək məqsədilə yaradılıb. ZOOM platforması vasitəsilə keçirilən mühazirəyə 60 nəfərədək tələbə qoşulmuş, onların arasında  Xəzər Universiteti, ADA, Azərbaycan Dillər Universiteti, BMU, habelə Təhsil Nazirliyinin “Bir” Tələbə-Könüllü Proqramının nümayəndələri olub.
 
İştirakçılar Ülviyyə Tağızadə tərəfindən tövsiyə olunmuş kitabları Bakı Kitab Mərkəzinə yaxınlaşıb, tələbə vəsiqələrinin əsasında əldə edə bilərlər.