Fevralın 22-də Bakı Kitab Mərkəzində “Üçbucaq” erkən inkişaf studiyasının rəhbəri İnna Rüstəmovanın "Kuklalarla dərslər" kiçik pyeslər toplusunun təqdimatı keçirilib.
 
BKM-nin direktoru G. Rzayeva kitabın əhəmiyyətindən danışıb və qeyd edib ki, “Kuklalarla dərslər" kitabı ibtidai uşaq tədris müəssisələrində dərs deyən müəllimlər və tərbiyəçilər üçün əvəzolunmaz vəsait ola bilər.
 
İ. Rüstəmova, öz növbəsində, kitab haqqında məlumat verib və qeyd edib ki, bu kitabdan istifadə edərək, müəllimlər və tərbiyəçilər maraqlı, mənalı, dolğun bir dərs təşkil edib, uşaqlara müxtəlif mövzuları sadə və aydın dildə izah edə bilərlər. Müəllifin sözlərinə görə, kukla ən qədim insan oyuncaqlarından biridir. Uşaqlar kuklalarla erkən yaşlarından oynayır, onlar uşaqlara düşüncə, təsəvvür, yaradıcılıq, insanlarla ünsiyyət qabiliyyətini inkişaf etdirməyə kömək edir. 
 
Tədbirdə uşaq animatoru Samirə Məcidovanın canlı ifasında İ. Rüstəmovanın əsərləri əsasına qurulmuş kiçik səhnəciklər nümayiş olunub. Bundan əlavə, “Simurq” uşaq musiqi festivalının iştirakçıları gözəl musiqi ifaları ilə qonaqları sevindirib, tədbirə gələnlərdə xoş əhval yaradıb.
 
Qeyd edək ki, Azərbaycan və rus dillərində nəşr olunmuş kitaba «Nəzakət dərsi», «Sözəbaxmaz kirpinin nağılı», «Bir sevgi nağılı», «Payızla vidalaşma», «Tərəvəzlərlə görüş» və s. kiçik pyeslər daxildir.