Fevralın 23-də Bakı Kitab Mərkəzində tanınmış aktyor, rəssam, teleaparıcı və yazıçı Bəhram Bağırzadənin “Мечты сбываются” («Arzular gerçəkləşir”) adlı xatirələr fotoalbomunun təqdimatı və imzalanması keçirildi. 
 
Qonaqları salamlayan B. Bağırzadə qeyd etdi ki, kitabın satışından əldə ediləcək gəlir talassemiyadan əziyyət çəkən uşaqların müalicəsinə yönəldiləcək.
 
Tədbirdə çıxış edən xalq rəssamları Arif Əziz və Sakit Məmmədov, xalq yazıçıları Elmira Axundova və Çingiz Abdullayev, əməkdar incəsənət xadimi, bəstəkar Ruhəngiz Qasımova, həkim-oftalmoloq, professor Çingiz Carullazadə, əməkdar artist, telejurnalist Nərgiz Cəlilova və başqaları Bəhram haqqında xoş sözlər demiş, onun vətənpərvərlik, xalqına sədaqət və məhəbbət, keçmişə və yaşlı nəslə hörmət və əlbəttə ki, böyük yumor hissi kimi gözəl keyfiyyətlərindən danışmışlar. 
 
Tədbirdə nəfəs alətləri ansamblının ifasında səslənmiş caz təranələri toplaşanlarda xüsusi xoş ovqat yaratmışdır.
 
Qeyd edək ki, “Мечты сбываются” kitabına Bəhram Bağırzadənin həyat və yaradıcılığında rol oynamış şəxsiyyətlər haqqında xatirələr və çoxlu fotoşəkillər daxildir. Bu albomun qəhrəmanları arasında məşhur alimlər, yazıçılar, rəssamlar, heykəltəraşlar, kinorejissorlar, musiqiçilər, televiziya aparıcıları, aktyorlar, siyasətçilər, diplomatlar, jurnalistlər, tanınmış idmançılar, həkimlər, hərbçilər, xarici ölkələrin ulduzları və onun ailə üzvləri, sinif yoldaşları və "Bakılı oğlanlar" da vardır.
 
Albomun son sözündə B. Bağırzadə yazır: "Mənimlə görüşmək və yolun bir hissəsini bərabər getmək istəyən hər bir yol yoldaşıma minnətdaram. Paolo Koelyonun "Alkimyəçi" romanının qəhrəmanı tək, mən də inanıram ki, "bir insan həqiqətən bir şey istəyirsə, bütün Kainat onun arzusunun gerçəkləşməsinə kömək edəcək...".