Martın 5-də Bakı Kitab Mərkəzində “Dağ Yəhudilərinin Tarixi və Mədəniyyəti” adlı kitabın təqdimatı keçirildi. PA nümayəndələri, MM deputatları, bir sıra dövlətlərin diplomatik nümayəndələri və ictimai xadimlərin iştirak etdiyi tədbir Ümumdünya Dağ Yəhudiləri Konqresi tərəfindən təşkil olunmuşdur. 
 
Ümumdünya Dağ Yəhudiləri Konqresinin sədri Akif Qilalov çıxış edərək, vurğulamışdı ki, tolerantlığın və dini dözümlülüyün əyani nümunəsi olan Azərbaycanda müxtəlif xalqlar sülh və həmrəylik şəraitində yaşayır. Qeyd olundu ki, əsrlər boyu Azərbaycan və Dağ yahudilərini qardaşlıq əlaqələri birləşdirir.
 
Tədbirdə, həmçinin, siyasi elmlər üzrə fəlsəfə doktoru Məhsəti Əliyeva, xalq yazıçısı Elmira Axundova, ATƏT PA yanında İtaliya nümayəndə heyətinin sədri, İtaliya Deputatlar Palatasında Xarici Əlaqələr Komissiyasının sədr müavini Paolo Qrimoldi, ASAN Radionun direktoru Emin Musavi, Avropa yəhudilərinin Bakı icmasının baş ravvini Şneor Seqal, beynəlxalq münasibətlər üzrə tanınmış israilli ekspert Arye Qut çıxış etmişlər.
 
Mərasim zamanı kitabda əksini tapmış nadir fotoşəkillərdən və arxiv sənədlərindən ibarət sərgi nümayiş olunmuşdur.
 
Həmçinin, Bakı tarixinin tədqiqatçısı Fuad Axundov “Azərbaycan yəhudiləri: Qafqaz Qüdsü yaxud kiçik xalqın böyük taleyi” adlı maraqlı təqdimat ilə çıxış etmişdir. 
 
Bakı Xoreoqrafiya Akademiyası şagirdlərinin ifasında milli rəqslər, Xalq artisti Mənsum İbrahimov və “Qarabağ” muğam üçlüyünün ifasında muğamlar və xalq mahnıları, pianoçu V. Aydəmirov və tarzən I. Babayevin ifasında lirik kompozisiyalar tamaşaçılar tərəfindən böyük rəğbət, maraq və alqışlarla qarşılanmışdır.
 
Tədbirdə qonaqlara dağ yəhudilərinin mətbəxindən yeməklər təqdim olunmuşdur. 
 
Qeyd edək ki, kitab müxtəlif ölkələri təmsil edən alimlərdən ibarət qrupunun hazırladığı unikal nəşr və fundamental əsərdir.