Martın 6-da BKM-də Beynəlxalq Qadınlar Gününə həsr olunmuş musiqili gecə keçirildi. Gecənin aparıcıları Emin Musavi, Ceyhun Əli və Cabir İmanov qadınları qarşıdan gələn bayram münasibətilə səmimiyyətlə təbrik etdilər. Onlar müdrik azərbaycanlı xanımların cəmiyyətimizdəki rolunu, onların Azərbaycan mədəniyyətinin formalaşmasına göstərdikləri böyük təsirini, ölkəmizin inkişafına misilsiz töhfələr vermələrini xüsusilə vurğuladılar.
 
Tədbirdə xalq yazıçıları Çingiz Abdullayev və Anar maraqlı və məzəli əhvalatlarla bölüşüb, toplaşanlarda xoş əhval-ruhiyyə yaradıb tədbirə təkrarolunmaz ovqat qatdılar.
 
SSRİ xalq artisti Fərhad Bədəlbəyli, Xalq artistləri Salman Qəmbərov, Yalçın Adıqözəlov, Murad Hüseynov, AR əməkdar incəsənət xadimi, görkəmli violonçel ifaçısı Dmitri Yablonski , əməkdar artist Ehtiram Hüseynov, beynəlxalq müsabiqələr laureatı Vüsal Aydəmirov bənzərsiz ifaları ilə tamaşaçıların zövqünü oxşadılar.
 
Gecənin sürprizlərindən biri Camir İmanovun bəstələdiyi, sözləri şair Aydan Xəndana məxsus "Ana" mahnısının premyerası oldu. Mahnı müğənni Orxan Cavadov və pianoçu Tural Məmmədlinin mahir ifasında dinləyicilərin zövqünü oxşadı. 
 
Musiqili gecədə, həmçinin, Azərbaycan Dövlət Mədəniyyət və İncəsənət Universitetinin tələbələrinin ifasında dillər əzbəri olan Azərbaycan mahnıları səsləndi. Qeyd edək ki, gecədə tamaşaçı auditoriyası xanımlardan, ifaçı qonaqlar isə bəylərdən ibarət idi.