Martın 27-də Bakı Kitab Mərkəzində Beynəlxalq teatr gününə həsr olunmuş bədii axşam keçirilib. Axşamada iştirak edən qonaqlar - dramaturq, teatrşünas Çingiz Ələsgərli, xalq yazıçısı Anar, xalq artisti Mərahim Fərzəlibəyov, S.Vurğun adına Azərbaycan Dövlət Rus Dram Teatrının director müavini V. Reznikova bütün sənətsevərləri Beynəlxalq teatr günü münasibətilə təbrik edib Azərbaycan teatrının zəngin bədii irsi və yaradıcılıq ənənələrinin qorunması barədə fikirləriylə bölüşdülər. 
 
Çıxış edənlər, həmçinin, Bakı bələdiyyə teatrının yaradıcısı və bədii rəhbəri, xalq artisti Amaliya Pənahovanın teatr və kino sənətinin inkişafında böyük xidmətlərini vurğuladılar. 
 
Axşamın bədii hissəsində əməkdar artistlər Hüsniyyə Mürvətova, Rafiq İbrahimov, Elxan Rzayev, Bakı Bələdiyyə Teatrının gənc aktyorları Toğrul Rza, Ülviyyə Rza, Tural Əhməd, Zülfiyyə Qurbanova, Arzu Ağayeva alman dramaturqu Fridrix Şillerin “Məkr və məhəbbət”, C. Məmmədquluzadənin “Ölülər” və Anarın «Qaravəlli» əsərləri əsasında qurulmuş tamaşalardan fraqmentlər göstərərək tamaşaçıların rəğbət və alqışlarını qazana bildilər. 
 
Tədbirin sonunda aktyorların ifasında İ.Nəsiminin “Hardasan” qəzəli, M. Müşfiqin “Gecə düşüncəsi”, R. Rövşənin “Qədrimi bilmədi bu adam mənim”, C. Cabbarlının “Ana” şeirləri də səsləndi.