Bu gün Bakı Kitab Mərkəzində YARADAN Yaradıcılıq Birliyinin “Yaradan uşaqlar” layihəsi çərçivəsində ərsəyə gəlmiş “Mən həyatda olmayanda” adlı kitabının təqdimatı keçirildi. 
 
Layihənin iştirakçıları bu kitabda “Mən həyatda olmayanda” mövzusunda öz fikirləri ilə bölüşürlər. Kitabda, həmçinin, “Yaradan uşaqlar”-ın foto və rəsmləri əks olunub.
 
Tədbirdə layihənin gənc iştirakçıları qonaqlarla fərqli ünsiyyət quraraq maraqlı interaktiv tamaşa göstərdilər, öz hisslərini rəqslərlə nümayiş etdirdilər, qonaqların qəlblərinin ən incə tellərinə toxundular.
 
Azərbaycan Uşaqlar Birliyinin sədri Kəmalə Ağazadə, layihə rəhbəri, yazıçı Nigar Rzayeva, yaradıcı qrupda rəssam-keramist Vüsalə Ağaraziyeva tədbirdə çıxış edərək, layihə haqqında qonaqlara məlumat verdilər və uşaqlara dəstək verməsinə görə Bakı Kitab Mərkəzində təşəkkürlərini bildirdilər. 
 
Tədbirin sonunda Bakı Kitab Mərkəzinin direktoru Günel Rzayeva bu sözləri dedi: “Bizim hamımızın qayğıya və sevgiyə ehtiyacı var. Bu uşaqların və onların rəhbərlərinin sayəsində bu gecədə biz bir daha anladıq ki, məhz bir-birimizə sevgi, diqqət və qayğı arxalandığımız və güvəndiyimiz dəyərlərdən olmalıdır. O zaman cəmiyyətimizdə uşaqlar və yeniyetmələrlə bağlı faciələr yaşanmaz”. 
 
Sonda I Love Baku brendi adından uşaqlara hədiyyələr təqdim olundu.