Aprelin 18-də Bakı Kitab Mərkəzinin və BMT-nin Təhsil, Elm və Mədəniyyət Təşkilatı - UNESCO-nun birgə təşkil etdiyi Ümumdünya Kitab və Müəlliflik hüququ gününə həsr olunmuş ədəbi-musiqili gecə keçirilmişdir.
 
Tədbirin rəsmi hissəsində çıxış edən XİN-nin Xüsusi tapşırıqlar üzrə səfiri, YUNESKO üzrə AR-nın Milli Komissiyasının Baş katibi Elnur Sultanov qeyd etmişdir ki, Ümumdünya Kitab və Müəlliflik hüququ günü aprelin 23-də UNESKO himayəsi altında bütün dünyada qeyd olunur.
 
Sonra çıxış edən Əqli Mülkiyyət Agentliyinin Aparat rəhbəri Natiq İsayev, Milli kitabxananın direktoru Kərim Tahirov, yazıçı Natiq Rəsulzadə, şair və tərcüməçi Səlim Babullaoğlu, Miniatür kitab muzeyinin təsisçisi və rəhbəri Zərifə Salahova mütaliənin həyatımızda vacib rolundan danışdılar.
 
Tədbirin bədii hissəsində Azərbaycan televiziyasının və radiosunun diktoru, gənc qiraətçi Hüseynağa Aslanovun ifasında Azərbaycan və dünya klassiklərinin əsərlərindən parçalar səsləndi. Beynəlxalq və Respublika müsabiqələri laureatları Nərmin Rzayeva (piano), İsmayıl Zülfüqarov (tar), Mədinə Şahgəldiyeva (kamança) “Şur” və “Bayatı Şiraz” muğamlarını, görkəmli Azərbaycan bəstəkarlarının əsərlərini ifa etdilər.