Aprelin 19-da  BKM-də Heydər Əliyev Fondunun və “Zəfər” Şəhid ailələrinə dəstək İctimai birliyinin təşkilati dəstəyi ilə Ş. Ağayarın “Komandir” romanının təqdimat mərasimi keçirilib.
 
Əfsanəvi kəşfiyyatçı, Aprel döyüşlərinin şəhidi, polkovnik-leytenant Raquf Orucova həsr olunmuş kitab real faktlar əsasında qələmə alınmışdır.
 
Əsərdə R. Orucovun həyatı və 25 illik hərbi fəaliyyətinin bir qismi öz əksini tapmışdır.
 
Tədbirin əvvəlində Raquf Orucovun hərbi fəaliyyətini, Murov istiqamətində xidmət etdiyi uğurlu kəşfiyyat əməliyyatlarını əks etdirən və Vətən uğrunda şəhid olan qəhramanlarımızın xatirəsinə həsr edilmiş qısa sənədli film nümayiş olundu.
 
Mərasimdə çıxış edən kitabın müəllifi, yazıçı Şərif Ağayar, Millət vəkilləri Gövhər Baxşəliyeva, Qənirə Paşayeva, Aqil Abbas, Fazil Mustafa, kitabın redaktoru İlham Tumas, yazıçı Əjdər Ol, R. Orucovun döyüş yoldaşı Rasim Fərşidov, jurnalist Elşən Əliyev romanın mahiyyətindən, kəşfiyyatçı sənətinin çətinliklərindən, R.Orucovun Azərbaycan xalqının qarşısında xidmətlərindən və qəhrəmanlığından danışdılar, həyatlarını Vətənin azadlığı və müstəqilliyi uğrunda qurban vermiş şəhidlərin xatirəsini qoruyub saxlamasının vacibliyini vurğuladılar.
 
Son sözdə şəhidin həyat yoldaşı Sevinc Alızadə Heydər Əliyev Fonduna və Bakı Kitab Mərkəzinə təşəkkürünü bildirdi.