Mayın 8-də Bakı Kitab Mərkəzində “Yolum keçir Qarabağdan” adlı rəsm sərgisinin və eyni adlı kataloqun təqdimat mərasimi keçirilib.

Mərasimində Heydər Əliyev Fondunun vitse-prezidenti Leyla Əliyeva, ölkənin tanınmış ictimai və siyasi xadimləri, ziyalıları və media nümayəndələri iştirak ediblər.

Sərgidə Nyu-Yorkda fəaliyyət göstərən “My Way” Uşaq və Yeniyetmələrin Yaradıcılıq Mərkəzi şagirdlərinin yaratdığı və Azərbaycanın Dağlıq Qarabağ bölgəsinə həsr olunmuş qırxa yaxın əsəri nümayiş olunub.

Tədbiri giriş sözü ilə açan BKM-nin direktoru Günel Rzayeva layihənin ideyasından, yaranma tarixindən və önəmindən danışıb, bu işdə əməyi olan hər kəsə təşəkkürünü bildirib. Daha sonra tədbirin aparıcısı Ceyhun Əli sözü “My Way” təşkilatının təsisçisi və direktoru Alyona Bədəlovaya verib. A.Bədəlova çıxışında qeyd edib ki, gənc amerikalı rəssamlar Azərbaycanda heç vaxt olmasalar da Qarabağ və onun acı taleyi haqqında məlumatı müxtəlif mənbələrdən toplayıb, bu bölgənin mədəniyyətini və füsünkar təbiətini rəsm əsərlərində əks etdirməyə çalışıblar.

Tədbirdə söz alan xalq yazıçısı Anar, SSRİ xalq artisti Fərhad Bədəlbəyli, xalq rəssamı Ağəli İbrahimov sərginin əhəmiyyətindən, Azərbaycanın mədəniyyət paytaxtlarından olan Qarabağın incisi Şuşa şəhərinin işğalından ürək ağrısı ilə danışıblar.

Tədbirin sonunda “Simurq” uşaq musiqi festivalının gənc və istedadlı qalibləri və laureatları və Bülbül adına musiqi məktəbinin şagirdləri Azərbaycan və dünya klassiklərinin əsərlərindən ibarət rəngarəbg konsert proqramı ilə çıxış ediblər.