Mayın 14-də Bakı Kitab Mərkəzində “DAYAQ” patronaj xidmətinin təşkilatçılığı ilə “Altsheymer xəstəliyi. Ailəyə dəstək” adlı seminar və eyni adlı kitabçanın təqdimatı keçirilib.
 
Seminarda giriş sözü ilə çıxış edən filologiya üzrə fəlsəfə doktoru Nüşabə Hüseynli Altsheymer xəstəliyi haqqında, Milli Onkologiya Mərkəzinin həkim-reanimatoloqu Nərminə Əzizova isə “DAYAQ” patronaj xidməti haqqında ətraflı məlumat vermişdir. Qeyd olunmuşdur ki, dünyada bu xəstəlikdən əziyyət çəkənlərin sayı 2006-cı il statistikasına görə 26,6 milyon olub. 2050-ci ildə isə bu rəqəmin dörd dəfə artacağı gözlənilir.
 
Daha sonra Ə.Əliyev adına Azərbaycan Dövlət Həkimləri Təkmilləşdirmə İnstitutunun Nevrologiya kafedrasının müdiri, professor Rəna Şirəliyeva, Psixologiya elmləri namizədi, Bakı Dövlət Universitetində “Gender və tətbiqi psixologiya” kafedrasının rəhbəri, dosent Rəna İbrahimbəyova və başqaları Altsheymer xəstəliyinin risk faktorlarından, bu xəstəliyin profilaktikasının əsasını təşkil edən vacib kriteriyalardan danışdılar.
 
Tədbirdə, həmçinin, demensiya haqqında təqdimat və Altsheymer xəstəliyindən əziyyət çəkən insanlardan bəhs edən «Özgə vaxt» və «Hələ də Elis» bədii filmlərdən fraqmentlər nümayiş olundu. Qeyd edək ki, “DAYAQ” patronaj xidmətinin dəstəyi ilə tərtib edilmiş “Altsheymer xəstəliyi. Ailəyə dəstək” adlı kitabça artıq Bakı Kitab Mərkəzində satışdadır.