Mayın 31-də Bakı Kitab Mərkəzində Azərbaycan Gözdən Əlillər Cəmiyyəti və Əlil Ziyalılar ictimai birliklərinin birgə icra etdikləri “Görmə imkanları məhdud uşaqlar üçün müyəssər formatlı nəşrlərin hazırlanması” adlı layihəsinin təqdimatı keçirilib.

Bu layihə Əmək və Əhalinin Sosial Müdafiəsi Nazirliyi yanında Dövlət sosial Müdafiəsi Fondunun maliyyə dəstəyi ilə həyata keçirilmiş silsilə layihələrdən biridir. 

Tədbirdə görmə və eşitmə üzrə əlilliyi olan uşaqlar üçün ölkədə ilk dəfə olaraq hazırlanmış tiflo-surdo elekton və daktil kitablar təqdim edilib və uşaqlara hədiyyə olunub. 

BKM-nin direktoru G. Rzayeva bugünkü tədbirin Uşaqların Beynəlxalq Müdafiəsi Gününə həsr olmasını vurğulayaraq qeyd edib ki, Mərkəzdə görmə imkanları məhdud insanlar üçün hər bir şərait yaradılıb.

İştirakçılara layihə çərçivəsində hazırlanmış kitablardan biri olan “Qoğal” nağılının video versiyası nümayiş olunub.

AGƏC-in vitse-prezidenti Reyhan Cəfərova layihə haqqında ətraflı məlumat verib. Əmək və Əhalinin Sosial Müdafiəsi Nazirliyinin nümayəndəsi Lalə Kazımova, Azərbaycanın əməkdar artistləri Nərgiz Cəlilova və Rafiq Həşimov, AGƏC Brayl Nəşrləri İnformasiya Resurs Mərkəzinin direktoru Mais Muradov və başqaları layihənin əhəmiyyətindən, görmə imkanları məhdud şəxslərin həyatında müyəssər kitabların rolundan söz açdılar. 
Tədbir çərçivəsində Bakı Kitab Mərkəzinin “OYAN” jurnalının ikinci nömrəsi uşaqlara hədiyyə olundu. 

Tədbirin bədii hissəsində müğənni Murad Sadıx, Beynəlxalq müsabiqələr laureatı Jalə Mayılova və başqalarının ifasında musiqi nümunələr səsləndi.