Bu gün Qazaxıstanın görkəmli şairi Oljas Süleymenov Bakı Kitab Mərkəzinin qonağı oldu. Şairin oxucularla və yaradıcı ziyalılarla görüşü BKM-nin “Yazıçı ilə dialoq” layihəsi çərçivəsində baş tutdu.

Oljas Süleymenov – dövrümüzün ən məşhur qazax şairi, yazıçısı, linqvisti, ictimai xadimi, Azərbaycanın böyük dostu kimi tanınır. Onun yaradıcılığı həmişə öz zənginliyi, tarixiliyi və novatorluğu ilə seçilib. Yazıçının ən məşhur “Az i Ya” əsəri 1975-ci ildə nəşr ediləndən sonra uzun illər sovet ideoloji cəbhəsinin hücumlarına məruz qalsa da, bütün dünyada ciddi rezonans doğurmuşdur.
 
Bakı Kitab Mərkəzində çıxış edərək Oljas Süleymenov Azərbaycana tez-tez gəlməsini və bu diyarın onun üçün doğma və yaxın bir ölkə olmasını qeyd etdi. Görkəmli şair dedi ki, Azərbaycana həmişə böyük sevinc hissi ilə gəlir, çünki onu Azərbaycanın bir çox görkəmli yazıçıları və incəsənət xadimləri ilə çoxillik dostluq əlaqələri bağlayır. Qonaq deyib: “Bakı inanılmaz gözəl şəhərdir. Mən hər dəfə paytaxtınızın gözəlliyinə və bakılıların qonaqpərvərliyinə heyran oluram. Bu dəfə isə mənə gözəl Sumqayıt şəhərinə getmək nəsib oldu. Sumqayıt məndə gözəl təəssürat yaratdı. Sevindirici haldır ki, Azərbaycan sürətlə inkişaf edir. Mənə xoşdur ki, ölkənizdə mənim yaradıcılığımı yüksək qiymətləndirirlər. Bu görüşü təşkil etdiyinə görə Bakı Kitab Mərkəzinin rəhbərliyinə də təşəkkür etmək istəyirəm”.
 
Oljas Süleymenov, həmçinin, vaxtilə onun təşəbbüsü ilə həyata keçirilən “Nevada-Semipalatinsk” antinüvə hərəkatından söz açıb, bir çox vacib mövzulara toxundu, sonra görüş iştirakçılarının suallarını cavablandırdı və oxucular üçün kitablarını imzaladı.
 
Xalq yazıçısı, deputat Elmira Axundova onun yaradıcılığına həmişə dəstək göstərdiyinə görə şairə minnətdarlığını bildirərək deyib ki, Oljas Süleymenov “Heydər Əliyev. Şəxsiyyət və zaman” çoxcildliyinin yaradılmasında ona böyük dəstək göstərib. Xalq yazıçısı Natiq Rəsulzadə vurğulayıb ki, Oljas Süleymenovun dünya ədəbiyyatına töhfəsi ölçüyəgəlməzdir. Onun yaradıcılığı bütün zəmanələrdə aktualdır.