Oktyabrın 29-da Bakı Kitab Mərkəzində mərhum yazıçı, jurnalist Çingiz Ələkbərzadənin yenidən nəşr olunmuş “Zindan” adlı kitabının təqdimatı keçirilib. Kitaba “Zindan” və “Dünyanın qopduğu yer” romanları daxildir. Qeyd edək ki, Ç.Ələkbərzadənin “Dünyanın qopduğu yer” romanı Azərbaycan xalq yazıçısı Əbülhəsən Ələkbərzadənin 1933 -cü ildə yazdığı "Dünya qopur" romanının davamıdır.

BKM-nin direktoru Günel Anarqızı kitabın ərsəyə gəlməsində əməyi olan hər kəsə minnətdarlığını bildirərək, müasir oxuculara bu romanın oxumağa tövsiyə etdi.

Tədbiri aparan telejurnalist Xədicə Sənanqızı kitabın təqdimatının keçirilməsini yazıçıya olan ehtiramın əlaməti kimi qiymətləndirdi. Mərasimdə xalq yazıçısı Anar, xalq şairi Ramiz Rövşən, əməkdar artist Gülşən Əkbərova Ç. Ələkbərzadənin milli nasirlər arasında öz dəst-xətti, orijinallığı ilə seçilən, azad düşüncəyə malik bir insan olduğunu vurğulamış, Azərbaycan ədəbiyyatında və jurnalistikada qoyduğu izdən danışdılar.

ASAN radionun direktoru Emin Musavinin ifasında “Zindan” kitabının proloqundan parçalar, Azərbaycanın xalq artisti Mehriban Zəkinin ifasında isə yazıçının “Anam şöhrət” və “Darıxıram” şeirləri səsləndi. Mərhum yazıçının qızları Elmira və Sevda Ələkbərzadə gecədə musiqili ifaları ilə tamaşaçılara xoş anlar yaşatdılar. Tədbirdə yazıçının nəvəsi Səidə Ələkbərzadə də çıxış edərək tamaşaçılara əsərini təqdim etdi.

Mərasim “Salam, Allahım” mahnısının sədaları altında Dövlət Pantomima Teatrının aktyoru, Azərbaycanın əməkdar artisti Bəhruz Vaqifoğlunun iştirakı ilə təqdim olunan səhnəcik ilə başa çatdı.