Noyabrın 21-də gənclərin dünyagörüşünü genişləndirmək məqsədilə yaradılan “YÜKSƏL” layihəsi çərçivəsində növbəti mühazirə keçirildi.
 
“Bakı XIX əsrin sonu – XX əsrin əvvəllərində” mövzusundakı mühazirəni Bakı tarixinin tədqiqatçısı Fuad Axundov təqdim etdi. F. Axundov Bakının zəngin və şanlı tarixi və müasir inkişafı barədə geniş məlumat verdi.
 
Tarixçi danışdı ki, Q. Səidin “Əli və Nino” romanında təsvir olunan dövrdə Bakı zəngin etnik tərkibi ilə fərqlənirdi. O vaxtkı Bakının hər bir icması şəhərin ictimai və mədəni həyatına öz töhfəsini verirdi.
 
Bakının rəngarəng simasından söz açan F.Axundov, Azərbaycan paytaxtının inkişafında böyük rol oynayan görkəmli memarlardan, Azərbaycan xeyriyyəçilərin şəhərin inkişafına verdiyi böyük töhfələrdən, özündə Şərq və Qərb üslublarını cəmləşdirən Bakının memarlıq incilərindən danışdı.
 
Mühazirədə Azərbaycan Memarlıq və İnşaat Universitetinin, Bakı Dövlət Universitetinin və Azərbaycan Dövlət Pedaqoji Universitetinin tarix fakültəsinin tələbələri iştirak etdilər.
 
Mühazirədən sonra BKM adından iştirakçılara F.Axundov tərəfindən məsləhət görülmüş, gələcək seminarlarda müzakirə olunacaq mövzuya dair kitablar hədiyyə olundu.